EDITORYAL - Ang driver nga normal og utok

Ang tarong nga driver kun magmaneho og sakyanan puno sa kamabinantayon.

Sa mga disgrasya sa sakyanan, dali ra kaayo matumbok ang kapasinginlan.

Pipila niini mao ang palyado og preno nga sakyanan, ug ang palyado og   utok nga drayber sa sakyanan.

Ang sakyanan nga palyado og preno, kun husto og pangutok ang drayber, dali ra kaayo niya hialinggatan nga palyado ang preno niini busa mainampingon siya nga magpadagan sa maong sakyanan o kaha di na niya kini padaganon.

Apan kun yabag og utok ang drayber, bisan unsa ka sakat ang preno sa iyang sakyanan, madisgrasya gyud tungod kay ang maong matang drayber wa maghunahuna sa iyang kinabuhi ug sa kinabuhi sa iyang mga pasahero ug sa mga tawo ug mga butang nga anaa sa kadalanan.

Ang pagkayabag sa utok sa drayber maggumikan sa dakong problema sa iyang panimalay o kaha “high” sa gidiling drugas.

Anhi dinhi unta ipunting sa taga LTO, o kaha LTFRB o uban pang ahensya sa gobiyerno ang ilang panahon sa pagsukod pag-ayo sa utok sa matag drayber sa sakyanan una mobiyahe mahimong may pasahero siya o wala.

Gumikan sa kakuwang sa mga otoridad sa panukdanan sa pagtino kun tarong ba og utok ang usa ka drayber una kini mobiyahe, di kalikayan ang disgrasya sa kadalanan nga usahay mokutlo og kinabuhi.

Apan murag wa sa maong mga ahensya ang maong gimbuhaton, kay wa sila maghimo og homework kalabot niini, busa makaluluoy kaayo ang tawo nga makasakay sa sakyanan nga manihuon sa drayber nga yabag og utok. Kay kun way suwerte kutob ra gyud ang imong kinabuhi sa maong adlaw. Di ba?