Makabungog nga mga allowance
Samtang gilingaw sa depensa ni Chief Justice Renato Corona ang mga Senator-judges ug ang publiko pinaagi sa pagpresentar og mga tistigos ug dokumento aron pagpasabot sa nagtipun-og niyang kabtangan, nabisto ang makabungog nga mga allowances nga gidawat ni Corona.
Sigun sa kawani sa Korte Suprema nga si Araceli Bayuga moabot og kapin sa P21 milyones ang income ni Corona sukad niadtong 2002 hangtud sa miaging tuig. Gusto nga ipagawas sa depensa nga maka-afford si Corona pagpalit sa mga condominium nga iya karong gipanag-iya tungod sa kadako sa iyang kita isip suholan ug mga allowances.
Sa tinguha sa depensa nga mapasabot ang tinubdan sa bahandi ni Corona nabisto ang anomaloso nga practice sa Korte Suprema pagpanghatag og allowances. Asa ka mangita og hapit kada buwan dunay gidawat nga Christmas bonus?
Samtang kitang ordinaryong magbubuhis nanglimbasog makakaon og katulo sa usa ka adlaw ug makabayad sa atong buhis sa gobyerno silang mga opisyal nagpahimulos og maayo sa atong kwarta.
Dia ang mga allowances nga gidawat ni Corona:
Longevity Pay (P163,662); PERA or Personal Equity and Retirement Account (P103,366); ADCOM or Additional Compensation (P79,366); RATA or Representation and Transportation Allowance (P2,119,147); Extraordinary and Miscellaneous Expenses (P2,522,888); Special Allowance ubos sa RA9277 kun ang balaud nga nagtugot og dugang allowances sa mga justices, judges ug ubang pwesto sa judiciary (P3,033,835); Additional Cost of Living Allowance (P280,350); Productivity Incentive Benefit (16,000); Clothing Allowance (36,000); Year-End Bonus and Cash Gift (P576,219); Loyalty Cash Award or Milestone Bonus (P10,000); Extraordinary and Miscellaneous Expenses isip chairman sa Presidential Electoral Tribunal (P1,867,733); Monthly Expense Allowance isip chairman sa Electoral Tribunal (P1,532,501); Emergency Economic Assistance (P895,671); Anniversary Bonus (P94,000); Productivity Enhancement Benefit (46,000); Christmas Cash Gift (P225,000); Additional Christmas Cash Gift (P57,000); Year-End Cash Gift (P15,500); Rice Allowance (P20,000); Groceries (P9,000); Additional Fringe Benefit and Supplemental Emergency Economic Assistance (P26,000); Fringe Benefit (P15,000); Fringe Benefit (P10,000); Supreme Court Christmas Allowance (P780,000); PET Christmas Allowance (P840,000).
Gawas niini si Corona nagdawat sab og allowance nga P389,672 isip chairman sa Judicial and Bar Council.
Karon nahibawo na ta nganong dili gyud ganahang mobiya sa pwesto si Corona.
Hinaut nga mahunong na ang pagpatuyang og hatag og allowances sa mga justices. Kun ang ordinaryong kawani sa gobyerno pugngan sa Commission on Audit nga mokobra og suholan sa laing katungdanan nga isangon nila, nganong wala man mabadlong ang doble-doble nga mga allowances ni Corona?
Kun atong tamdan ang listahan sa mga allowances ni Corona atong masabot nga ang tanan niyang gikinahanglan sa iyang pagpuyo kitang mga magbubuhis maoy nag-abaga. Gikan sa bisti lakip na hangtud sa iyang gikaon matag-adlaw.
* * *
- Latest
- Trending
