Gahum sa pag-ampo

Maghisgot gani og pag-ampo mahinumdom ko sa komedya sa akong amigong pari.

Siana: Lola taas na ang tubig mogawas na ta sa balay.

Mana: Ayaw kahadlok mag-ampo ta sa Santo Niño tabangan ta.

Siana: Hala Lola nisaka na sa sawog ang tubig.

Mana: Salig ta sa Santo Niño ampo lang ta.

Siana: Hala Lola nilutaw na ang Santo Niño.

Mana: Ah! Nahala adto na ta.

Siana: Ingon ka ampo lang ta.

Mana: Dili na madala kay ang Santo Niño milangoy na (Toink!/Aguy!) Hehehehehehehehehehehehehe!

Gawas sa dayag na nga kinaadman sa ikatulong anak sa pamilyang Miguel ug Doktor Irish Cabrera nga si PMA Cadet Jose Mari Cabrera, alang sa nagmayang inahan ang pag-ampo maoy dako kaayo og natampo sa kalamposan sa iyang anak.

Sa wala pa masayod, ang 22 anyos nga Sugbuanong si Jose Mari Cabrera maoy second placer sa Bagwis Class sa Philippine Military Academy tuig 2012. Ikaduha siya ni Cadet Tom Puertollano nga taga Batangas nga musulod sa Philippine Army (PA) samtang si Cabrera sa Philippine Air Force (PAF).

Si Jose Mari nga tawgon sa ilang pamilya og “Baby Boy” maoy bugtong lalaki sa upat ka anak sa pamilyang Cabrera. Siya ra sab sa mga anak nga natawo sa ilang panimalay ug diriyot pa mapildi kun wala pa maluwas sa “mouth to mouth resuscitation” dihang nilagom ug naglisod paginhawa pagawas sa taguangkan sa iyang inahan.

Mao pa gani pagawas sa kalibotan gilihian na siya og “panlimbasog”.

Sakop sa Pentecostal Missionary Church of Christ ang pamilyang Cabrera. Si Doktor Irish Cabrera nga usa ka Optometrist mihulagway nga ang pagsulod sa iyang anak sa PMA nakapaduol kaniya pag-ayo sa pagtulon-an sa ilang simbahan.

Sa matag-adlaw mapiko ang iyang tuhod aron paghalad og pag-ampo alang sa iyang anak nga hatagan og giya, kusog ug pailob sa gitinguhang kalamposan.

Si Jose Mari nagtungha na sa ikaduhang tuig sa kursong accountancy sa USJR dihang nakapasar sa eksamin sa PMA. Wala planoha ang iyang pagsulod sa akademiya nga gituhoan sa iyang amahan nga si Miguel nga posebling sugo sa ilang dugo tungod kay daghan sa mga uyoan sa batan-ong Cabrera habig sa iyang amahan nga sakop sa Armadong Kusog sa Nasud.

Mabulokon ang sugilanon sa paningkamot sa Sugboanong batan-on ug sa kayano sa kinabuhi sa pamilyang Cabrera. Laing makadasig nga kalamposan taliwa sa paningkamot, pailob ug labaw sa tanan sa pag-ampo.

Isip usa ka Sugbuanon napagan ko sa garbo nga bunga sa kalig-on, pagsalig ug kompiyansa sa kaugalingon ug ang subling pagpakita sa dili basta-basta nga kapabilidad sa taga Sugbo.

Alang ni Cadet Jose Mari Cabrera ug sa iyang pamilya mga pahalipay.

Samtang laing makabungog nga pahalipay sa pamilyang Gullas. Ang apo ni Kongresista Eduardo Gullas sa unang distrito sa Sugbo nga si Vincent Edward Anthony Retardo Gullas sa Velez College maoy top sa Medical Technology Licensure Exam karong tuiga.

Ikaduha ang laing Sugbuana nga si Nikki Gigi Aytona Legaspi sa Southwestern University.

Laing mga batan-ong Sugbuanon nga naghatag og dakong garbo sa Sugbo.

(emailad: [email protected])