Kumbati in the city

Nakakita na gayud og lig-ong kaatbang ang Bando Osmeña - Pundok Kauswagan (BOPK). Sukwahi kini sa kanunay nga gipasi-atab ni Kong. Tomas Osmeña nga maglisud pagpangita og mga kandidato si Mayor Mike Rama.

Karon pa ako makadungog kang Kong. Tomas nga miangkon nga kini ang kinalig-onan nilang makaatbang sukad sa piniliay dinhi sa Cebu City. Ambot og nawala na ba ang garbo sa kongresista o iya ba kining gihimo aron maninguha pagkampanya ang iyang mga kandidato o aron ba mokompiyansa ang ilang mga kaatbang.

Nagsugod na sa pulongpulong sa mga sityo ug barangay ang mga sakop sa BOPK. Kumusta man ang reformist group ni Mayor Rama? Tingali'g mangatulog mo sa pansitan ha?

Angay ninyong himoong leksiyon kadtong unang panagsangka nila ni Kong. Tomas ug Mayor Alvin Garcia diin naglawig sa kadaugan ang mayor apan naparut siya tungod sa kompiyansa.

Ang akong nasayran nga wala na mohimo og special operations ang Kugi Uswag Sugbo (Kusug) kay nagtoo na sila sa ilang kadaugan. Ang wala nila masayri nga ang ilang mga dumadapig nga wala gamita nila ni Garcia isip watchers sa mga presinto gibayran sa BOPK ug gigamit nilang mga watchers.

Ang mga insiders sa BOPK nga mibali na ug si Rama mismo, nasayud kun unsa ang ilang estratihiya panahon sa eleksiyon. Karon ang BOPK ug ang mga reformist magtakus ginamit ang maong estratihiya.

Anha na kini dauga sa campaign funds. Samtang nasayud kita nga nagsinumbagay ang salapi sa puntil sa BOPK apan nagtoo ako nga bastanti usab ang pundo sa grupo ni Mayor Rama. Ang timailhan niini mao ang mga buot motapon ug ang mga nag-inilugay na karon nga mokandidato ubos sa reformist group. Mao kini ang kumbati in the city.

* * *

Wala pa masayri kun unsa ang baruganan karon sa Kusug. Aktibo ba silang moapil sa kumbati batok sa BOPK o manampiling ba lang sila sa daplin samtang mosud-ong sa mga higante'ng magbugno?

Samtang wala pa makapatawag og tigum ang supremo sa Kusug nga si kanhi mayor Garcia ang uban niyang mga sakop mipahibawo na nga moabin kang Rama. Si Barangay Tinago Konsehal Joel Garganera uyon nga modagan pagkakonsehal ubos sa reformist group. Si Barangay Kasambagan Konsehal (1st) George Chang dugay nang nagkuyogkuyog kang Rama samtang ang inilang abogado ug Brig. Gen. (ret.) Fritz Quiñanola ug businessman Lau Rogero naghuwat lang sa maayong panahon.

Ang malipayon kaayo niining paglig-on sa reformist group mao ang bugtong konsehal nga misukol kang kanhi Mayor Osmeña si kanhi Cebu City Councilor Ernie "Pretty Boy" Elizondo ug ang mga siyudadnon ug mga balikbayan nga nakasaway niining gihimo sa konseho batok sa mayor.

* * *

Samtang klaro na nga si kanhi Kong. Tony Cuenco ang kandidato sa pagkakongresista sa south district ubos sa reformist group wala pa makahukom ang BOPK sa ilang kandidato. Ang gikonsiderar mao sila si Konsehal Margot Osmeña, Konsehal Bebot Abellanosa ug kanhi undersecretary sa Department of Transportation and Communication Totol Batuhan.

Sa laing bahin, samtang siguro na nga si incumbent Kong. Cutie del Mar o kaha ang iyang amahan si kanhi deputy house speaker Raul ang modagan sa north district gihashasan pa sa reformist group ang ilang kandidato nga nag-apil sa inilang eye specialist Dr. Potenciano "Yong" Larrazabal 111 ug kanhi kapitan sa Barangay Lahug Mary Ann delos Santos. Gihisgutan usab ang ngalan nila ni kanhi mayor Garcia ug kanhi konsehal Aven Piramide.

* * *

Akong mga pagdayeg ug pasalamat ngadto kang Barangay Kapitan Dave Tumulak tungod sa ilang kasaligan kaayo nga Basak-Pardo Emergency Rescue Unit (mao ba kini husto'ng ngalan, Kap?) nga maoy nagdala kanako sa ospital sa dihang hikit-an ako nga nakatulog sulod sa akong sakyanan sulod sa pito ka oras tungod sa diabetes. Makatupong na sila sa Emergency Rescue Unit Foundation (ERUF). Congrats!

* * *

Email: [email protected]