Ang politika sa Compostela

Human sa kapin usa ka tuig may mayor na gyod ang lungsod sa Compostela sa Lalawigan sa Sugbo. Kaniadtong adlaw nga Martes nanumpa atubangan ni Kongresista Red Durano sa kinto distrito si Mayor Joel Quiño ug mga kaubanan human sila iproklamar sa Commission on Election didto sa kaulohan nga mananaug sa milabay nga 2010 nga bugnong lugaynon. Ang bise gobernadora nga si Agnes Magpale misaksi usab sa pagpanumpa ni Mayor Quiño ug mga kaubanan. Sa iyang pagpamulong atubangan sa iyang mga dumadapig wala kapugngi sa mayor ang pagpadagayday sa iyang mga luha tungod ba kaha sa kadaugan nga iya na gyod nga nakuha.

Apan bisan pa man og nanumpa na si Mayor Joel Quiño sa iyang katungdanan wala gihapon mosurender ang iyang kaatbang sa politika nga si kanhi Mayor Richie Wagas. Si Wagas modagan pa didto sa Korte Suprema aron iyang ipabaliktad ang proklamasyon sa Commission on Election kang Mayor Quiño. Porbida!

Kung ako’y Wagas magtigum na lang ko og dugang kusog para sa sunod nga bugnong lugaynon ina kay magkapoy-kapoy ug mag usik-usik og kwarta pagpaabot sa iyang reklamo didto sa Korte Suprema.

Gamay na lang ang nahabilin nga oras ni Wagas busa kun moadto pa siya sa Korte Suprema ug ideklarar nga mananaug pila na lang ka adlaw o buwan eleksyon na. Busa sayang sa oras ug kuwarta, gawas lang seguro kun nagsumbagay na ang kwarta ni Wagas tungod sa kadaghan. Ang angayan segurong himoon ni Wagas mao ang pagpangampanya na lang daan para sa moabot nga bugnong lugaynon ug pasagdan si Joel Quiño sa iyang mga gimbuhaton isip mayor. Niining puntoha makabintaha pa siya sa iyang kaatbang sa politika tungod kay dili siya mabalda sa mga suliran sa lungsod sa iyang pagpangampanya ug gani puwede pa niyang magamit ang mga suliran sa iyang lungsod sa pagpangampanya batok sa bag-o lang milingkod nga mayor nga iyang kaatbang sa politika.

Maayong gamiton ni kanhi mayor Richie Wagas ang iyang kaparotan nga giya ug kusog alang sa iyang pagbangon tungod ug alang sa katawhan sa lungsod sa Compostela nga buot niyang padayonan sa pag-alagad.