Sa karong impeachment trial ni Corona.

Sa akong tan-aw niining impeachment hearing ni Chief Justice Renato Corona sa senado, mora’g gusto gyud dugaydugayon sa depensa ang maong husay. Maayo ang mga abogado ni Corona. Apan ang mga tawo nga nagsunod sa maong impeachment trial, sama kanako, makaingon gayod tingali nga kaduhaduhaan kun makalusot ba si Corona niining dakong kaso nga iyang giatubang.

Dili kay ang mga Senator Judges lamang ang mohukom kang Corona. Labaw nga mopakanaog og hukom mao ang mga tawo base sa mga ebidensiya. Kun wala’y gitago si Corona, nganong dili man niya paablihan ang dollar account niya sa banko? Midapig ang mga senador sa TRO sa Korte Suprema nga dili buksan ang dollar account ni Corona.

Apan ang mga senador karon nag-amping gayod pag-ayo kay kun masipyat sila sa paghukom, maamong ang ilang political career labi na nga hapit na ang eleksiyon. Mao man gani nga daghan ang nagmulo sa mga senador nga mipabor sa TRO. 13 ka senador ang mibotar sa TRO, ug napulo ang mibotar nga supak.

Hinuon, nagtuo ko nga naniid lang ang mga senador nga mibotar sa pagdapig sa TRO kun unsa ang reaksiyon sa mga tawo. Lagmit nga nakita na nila karon nga ang kadaghanan sa mga Pilipino wala makauyon sa ilang pagdapig sa TRO.

Nakapabor niini ang mibotar sa pagsupak kay duol sila sa kasingkasing sa kadaghanan kanato. Ngano ba tuod nga dili man paablihan ang dollar account ni Corona sa banko? Klaro kaayo nga dunay gitago. Ug kini ang anaa sa hunahuna sa mga tawo.

Kun makalusot si Corona sa giatubang niyang impeachment trial, mawala gihapoy kapuslanan kay namansahan na ang iyang pagkatawo. Wala na siya’y kridibilidad nga mamuno sa Kinatas-ang Hukmanan.

Ug niini, mawad-an na gayod og pagsalig ang mga tawo sa Supreme Court. Angayan lang gayod nga mawala si Corona sa iyang katungdanan sa Supreme Court pinaagi sa pag-resign kun pananglitan makalingkawas siya niining impeachment trial.