Fire truck sa Dalaguete gipaabangan

Dinhi lang sa Pilipinas paabangan ang fire truck ug asang dapita sa Pilipinas? Dinhi lang sa Sugbo. Asa man usab nga dapita sa Sugbo? Aw asa man diay, sa lungsod sa Dalaguete!

Kaniadtong miaging semana atong gisulat dinhi ang fire truck sa lungsod sa Dalaguete nga naghakot og tubig para sa swimming pool sa usa ka magpapatigayon. Ang tubig gihakot gikan sa usa ka fire hydrant kaniadtong Pebrero kuwatro. Gikan sa alas nueve sa buntag hangtod sa alas singko sa hapon sa maong adlaw upat ka fire truck ang nahakot nga tubig nga gihatod sa barangay Coro sa nahisgutang lungsod diin nahimutang ang panimalay ni ginang Vangie Ybanez.

Sa pakighinabi sa Super Radyo ngadto kang Dalaguete Mayor Ronald Allan Cesante iyang giangkon nga siya ang nagsugo sa pagpahakot og tubig gamit ang fire truck sa lungsod aron gamiton sa swimming pool ni ginang Ybanez. Apan iyang gipasabot nga iyang gipaabangan ang fire truck aron makasapi ang lungsod. Wala hinoon niya itug-an kun pila ang giabang sa magpapatigayon ngadto sa lungsod.

Ang fire truck nga gipaabangan para maghakot og tubig para sa swimming pool sa usa ka pribadong tawo usa sa gipang-apod-apod sa kagamhanan sa lalawigan sa Sugbo ngadto sa kalungsuran aron maoy magamit kun ugaling adunay sunog nga moigo sa lungsod o mga kasikbit nga dapit.

Sigon sa kasabotan tali sa lungsod sa Dalaguete ug Lalawigan, ang fire truck gamiton lamang gayod kun adunay sunog ug wala nay lain pa. Mao kini ang gisulti ni bokal Sun Simura ang Chairman sa Committee on Public Safety and Security sa Hunta Probinsiyal nga gipangayoan sa iyang reaction. Busa wala itugot ang pagpaabang sa fire truck aron maghakot og tubig para sa swimming pool sa usa ka pribadong tawo. 

Ang Department of Interior and Local Government wala una mohatag sa ilang habig mahitungod sa reklamo tungod kay aduna pa usa’y nakaong-ong nga reklamo sa ilang buhatan mahitungod gihapon sa bombero sa lungsod sa Dalaguete nga wala makapaagas og tubig atol sa sunog sa balay sa usa ka konsehal tungod kay gubaon ang fire truck.

Ang gobernadora buot pang magpakisayod ngadto kang Mayor Ronald Allan Cesante sa katinuoran sa reklamo sa dili pa siya mohatag sa iyang komentaryo. Sayri unya mi gobernador kun nalipay ka ba o wala sa gihimo sa imong seguro paboritong mayor.