EDITORYAL - Suwerte kaayo si CJ Corona

Gihimadlan na ni Senador Miriam Santiago nga bisan pa kun makonbikto si Chief Justice Renato Corona niining impeachment case nga iyang giatubang, di siya matangtang sa trabaho.

Di usab siya mapriso  lahi kang Kongresista Gloria Macapagal Arroyo, ang kanhi presidente sa Pilipinas nga bisan wa ma-impeach apan napriso.

Mura bitaw og debuenas ning pagka-impeacha ni Corona itandi sa pagka-impeach ni kanhi presidente Estrada.

Kay ang kaligdong ug ka-tarong ni Senate President Juan Ponce Enrile, iya mang gipakita sa publiko nga usa siya ka huwes nga maayong laki niining pagdumala niya sa kaso ni Corona.

Mao bitaw hinungdan nga nakaingon si Estrada nga kun si Enrile pay huwes niadtong impeachment niya, malagmit untang di siya mokagulkol sa prisohan.

Apan ang kaso ni Corona ug Estrada , dako kaayo og kalainan, kay   si Estrada kaniadto may mga abogado mang milaban kaniya apan mura og   pirmeng bahag ang ikog.

Lahi sa kang Corona karon nga   may mga abogado nga pulos gyud mohambat kay pulos   maayong laki.

Gani murag mahanaw daw aso lang ang giingong wa magtinarong si Corona sa pagsang-at sa iyang SALN kay di man gusto ang mga abogado niya nga hisgotan pa kini.

Maoy hinungdan nga kun di makonbikto si Corona, aw nagpasabot nga hungaw ang mga pasangil nga gihan-ok batok kaniya. Apan kun makonbikto apan di matangtang sa trabaho, nakaingon ang ordinaryong mga kawani sa gobiyerno nga mas maayo gyud diay ang mga dagkong tawo kay bisan makonbikto di man mawad-an og trabaho.

Lahi sa mga ordinaryo nga di lang kay matangtang sa trabaho, di na gyud makasud pa og trabaho sa gobiyerno. Busa   ang impeachment usa ka maayong kasaysayan sa   kinabuhi ni Corona nga di angayang tawgon nga paggusbat sa demokrasya sa nasud.

Di usab angay nga basulon si Presidente Aquino bahin niini, kay isip presidente sa nasud iya lang gitan-aw ang kaangayan sa tanan. Di ba?