Ang prensa ug ang politika

Sa ngalan sa makiangayon ug patas nga pamahayag sa prensa, kami mga Staff sa opisina sa Mayor sa Barili, Sugbo, mopadayag sa among hiniusang habig sa isyu nga gibato sa among igsoon sa buhatan nga si Filomeno Leyson ug napatik sa Banat News niadtong Domingo Enero 8, 2012. Ang sugilanon kabahin sa uniform sa mga empleyado sa lungsod sa Barili, Cebu nga kunohay adunay anomaliya usa ka dakong bakak. Sa pagkatinuod ang mga empleyado nga giingon nga wala kadawat sa uniform, dili tinuoray nga wala kadawat, kay ang maong mga uniform dia ra man sa opisina sa Mayor, wala pa kuhaa sanglit aduna may mga deperensiya, hugot, luag ug hiwi. Tingali aduna may usa o duha nga wala kadawat apan sipyat kini sa mananahi ug dili ang munisipyo sanglit ila mang gipatahian kadtong mga empleyado nga wala kabayad kay ang ilang clothing allowance taudtaud na diay’ng nahalin sa mga tigpatanto.

Unya ang wala pa kabayad mao naman hinuon ang gipatahian! Gani si Mr. Raul Carreon, usa ka permanent employee nga na-assign sa public market, nga diin gitumbok ni Filomeno Leyson, nga kuno mireklamo kabahin sa uniform, mihimakak niini, kay siya nakasabot sa gidangatan sa uniform.

Hangyo lang unta sa katilingban nga kining mga opinyon nga wala masuta ang kamatuoran o bien adunay naghambin nga lain nga katuyoan, dili lang unta dayon isipon nga mao na ang tinuod, ilabi na sa wala pa masayod sa pagkatawo ni Filomeno Leyson.

Ang pagka-intrigador ug pagka-walay baruganan, maoy nakapaaghat sa mayor sa lungsod sa Barili nga taktakon si Filomeno Leyson isip designated Public Information Officer sa lungsod. Kay maoy nakahaling ug dugang kagubot sa panagbangi sa politika sa mayor ug sa bise mayor niini. Bisan pa man dili lumad nga taga Barili apan pinangga sa mayor, gihatagan si Filomeno Leyson ug maayong mga pwesto sa lokal nga kagamhanan.

Apan duha na ka bulan ang milabay, nagpakita na si Filomeno Leyson og pagdani ngadto sa bise mayor ug hinay hinay na kini og pangataki sa mayor. Supak sa lagda nga gilatid sa RA 6713 kon Code of Conduct and Ethical Standards for Public Officials and Employees. Mihangyo kini sa mayor nga pa-isyuhan siya og motorsiklo. Wala man tinuod mobalibad ang mayor apan gipasaligan nga sa sunod tuig na lang. Ug dinhi miulbo ang maong empleyado ug nahingpit ang iyang pakigbuwag sa mayor.

Ang isyu karon mao, angayan bang hatagan og gibug-aton ang banus-banus nga pasangil sa matag habig diha sa konteksto sa init nga pamolitika? Usa ka abnormal ang kahimtang politika karon sa lungsod sa Barili. Tataw nga dili na gyud kahulat sa eleksyon ang mga nangambisyon nga ma-opisyal sa lungsod. Apan hunahunaon nato nga ang mabiktima niini dili ang mga politiko kun dili ang katawhan.