Makonbikto kaha si Ecleo?

Sigun sa akong nasagap nga balita, nalangay ang hukmanan sa pagpakanaug sa iyang hukom sa kaso ni PBMA Supreme Master Kongresista Ruben Ecleo kana tungod kay nagsige og pangayo og lugway sa panahon ang prosecution sa pagsumiter sa ilang trial memorandum nga maoy basihan sa hukmanan sa pagpakanaug sa iyang hukom.

Ang abogado ni Kongresista Ruben Ecleo dali rang nakasumiter sa ilang trial memorandum nga nagladlad sa tanan nilang argumento ug balaod nga nanalipod sa ilang nilabanan o kliyente apan ang prosecution nagsige og pangayo og lugway sa ilang panahon sa pagsumiter sa ilang trial memorandum nga magladlad usab sa ilang mga argumento ug balaud nga mopaligon sa pagkonbikto ni Kongresista Ruben Ecleo Jr. Unsa may buot ipasabot niini? Nga naglisod ang prosecution sa pag-prosecute ni Ruben Ecleo Jr.?

* * *

Gisugdan na kagahapon sa hapon ang bista sa kasong impeachment batok kang Chief Justice Renato Corona. Sa miaging mga adlaw giwara-wara sa mga kongresista nga sakop sa prosecution team ang mga ebidensiya nga ilang gikuptan alang sa pag-prosecute sa pangulo sa Labaw’ng Hukmanan. Gani naglaraw usab ang prosecution nga ilang ipatawag ang mga sakop sa pamilya ni Corona. Ambot og unsay laraw sa prosecution aning ilang gihimo. Seguro gusto nilang taralon si Corona sa kalsada ug sa katawhan ug dili sa senado nga mao ang impeachment court. Nalimot ang mga kongresista nga ang mohukom ang senado ug dili ang katawhan. Nalimot usab ang mga kongresista nga ang Chief Justice mao ang gi-impeach ug dili ang iyang pamilya.

* * *

Samtang ang uban nga nanan-aw sa Sinulog nalingaw, ang uban kanila nagbagulbol tungod kay wa silay laing nakita gawas lang sa mga dancing contingent nga naglakaw ug wala magsayaw tungod kay sa ilang nahimutangan walay hurado sa Sinulog. Sugyot nako sa Sinulog foundation tagdon ug sabton ang sentimento sa mga nanan-aw sa gawas nga bahin sa grand stand nga gihikawan sa ilang nakita sa sulod. Mas maayo seguro nga dili magpermanente sa usa ka dapit ang mga hurado sa Sinulog aron dili mahibaw-an og asa sila nakapuwesto. Dili naman ugod manayaw ang dancing contingent sa mga dapit nga ilang mahibaw-an nga walay mga hurado.