EDITORYAL - SINUG ug di Sinulog alang sa tinuod nga Sugbuanon

Makahuloganon baya kaayo ang gipahayag ni kanhi Kongresista Jose"Dodong" R. Gullas sa unang distrito sa lalawigan sa Sugbo nga matud pa gawas lang kun ipahiuyon sa husto ug tukmang kahulogan sa SINUG ang gitampunsisokan karong Sinulog dinhi sa dakbayan sa Sugbo mahug ra gyud nga puro negosyo ang maong kalihokan ug wa gyu’y tipik labot sa tinuod nga pagdayeg ug pagpasalamat kang Sr. Sto Niño ang tanan.

Alang baya kang Sir Dodong, sa tinuod nga Sugboanon, SINUG gyud baya maoy tukmang termino niini ug di Sinulog.

Siya maoy usa sa angay tuohan sa tanang Sugboanon tungod kay siya si Mr. Gullas usa sa orihinal nga tigsayaw sa SINUG sa Basilica sa panahon pa sa Hapon.

Dan si kinsa mang mo-insister nga husto ang terminolohiyang Sinulog nga maoy gibalik-balik sulod na sa pila ka tuig, angay baya tingaleng mangonsulta kang Sir Dodong kay matawag man nato siya usa sa mga amahan niining maong matang sa kalihokan.

Alang kang Sir Dodong nga ang SINUG nila kaniadto wa magbugalbugal sa Sto. Niño kay sa ilang pagsayaw sa SINUG, kandila nga di dinagkotan ang ilang gikuptan sa kamot ug di kay Sto. Niño nga ilamba wala ug tuo dayon ipatuyok-tuyok samtang magsayaw.

Di man pag-unsa, ang tinuod lang sa maong paagi kun makasulti pa ang Sto. Niño ambot di ba kaha intawon kini moreklamo nga gikapoy siya, nalipong, gilabdan sa ulo ilabi na kun init kaayo ang adlaw o kaha magbunok ang uwan.

Matud pa ni Sir Dodong nga ang tukma ug hustong pagsimba ug pagtahod kang Sto. Niño angay siyang ibutang sa altar   ug di kay kuptan nga mura lang og duwaan nga mahimong ihapos bisan asa.

Busa si kinsa may dagko sa simbahan dinhi ug dagko niining kalihokan sa Sinulog angay bayang hinuktokan ang mga pamahayag ni Sir Dodong ug di angay ibali wala tungod kay di basta-basta puro Katoliko lang si Sir Dodong kundi   dako kaayo siya og pagtahod sa Sto. Niño .

Apan   sigun sa iyang nakita karon nga gihimo nalang negosyo ang maong Santos di malalim ang kasakit ug kahiubos nga iyang gibati. Di   ba?