City Hall batok BIR

Gimando ni Mayor Michael Rama ngadto sa executive director sa Cebu Investment Promotion Center nga paspasan ang accreditation sa SM Prime Holdings Incorporated.

Tumong sa mayor nga mamahimong accredited sa Philippine Economic Zone Authority ang SM aron makalingkawas ang dakbayan sa bayranan niini nga buhis sa luna nga ilang gibaligya diha sa South Road Properties ngadto sa SM.

Ang lakang sa dakbayan pagtabang sa accreditation sa SM sa PEZA ilang gihimo human gibalibaran sa Bureau of Internal Revenue kon BIR ang ilang hangyo nga ma-exempt ang dakbayan sa pagbayad sa buhis sa nahalin nga luna.

Mihangyo ang dakbayan sa BIR nga dili sila pabayron og buhis sanglit ang SRP gideklarar man nga usa ka special economic zone.

Apan matud sa BIR nga bisan economic zone ang SRP apan ang SM nga mipalit sa luna dili accredited sa PEZA hinungdan nga dili mamahimong exempted ang city government sa buluhisan.

Kini maoy nakaaghat ni Rama nga tinguhaon ang accreditation sa SM.

Apan hinaut gitun-an og maayo sa mayor ang ilang gihimo. Hinaut nga nasayod sila nga ang usa ka PEZA-accredited company dili mamahimong kolektahan og buhis.

Kun mahitabo nga maaprobahan ang accreditation sa SM Prime Holdings unsaon naman karon pagpangolekta sa gobyerno og buhis nila?

Dili kaha hinuon maalkansi ang dakbayan sa ngadto-ngadto niining maong plano?

Angayang tun-an sa mga abogado sa dakbayan ang nahitabo sa Imperial Hotel diha sa dakbayan sa Lapu-Lapu.

Tungod kay ang maong hotel accredited man sa PEZA way bisan usa ka dako nga buhis nga nakolekta ang gobyerno nila.

Bisan ang ilang mga importation libre sa buluhisan. Kun buot huna-hunaon kwestiyonable ang paghatag nila og accreditation tungod kay ang maong hotel nahimutang naman gawas sa economic zone diha sa Lapu-Lapu. Basin baya hinuon og sa tantong daginot sa dakbayan sa Sugbo mas dako na hinuon ang atong alkanse.

Maayong mangita sila og laing argumento pagkumbinsir sa BIR inay nga tabangan nga makakuha og accreditation sa PEZA ang SM.

* * *

[email protected]