Ang Diyos makapalibog usahay

Ang panultihon “God works in mysterious ways” tinuod. Dunay masakit nga panghitabo sa atong kinabuhi nga usahay ato nga kalibogan kun ngano nga nahitabo kanato.

Pananglit sa mga trahedya nga nahitabo sa Cagayan de Oro City, Iligan ug Negros Oriental nga gikusokuso ug gilampurnas sa bagyong “Sendong” nga tungod niadto mokapin sa usa ka libo ka tawo ang nangamatay.

Sa wala’y pagduhaduha daghan ang mga lumolupyo sa maong dapit nga mga Kristohanon ug nagtamod sa mga kasugoan ni Kristo. Apan, maglibog kita kun ngano nga ang Diyos mitugot man nga mahimo silang biktima sa maong trahedya karon nga miabot na ang Pasko.

Ang trahedya sa Cagayan de Oro, Iligan ug Negros Oriental nakapahinumdom kanako sa dihang giatake ako sa kasingkasing kaniadtong Disyembre 18, 2006. Niadtong higayona gimahayan ko ang Dios kun ngano nga ang iyang pagkastigo kanako naatol sa Pasko.

Lab-as pa sa akong panumduman nga samtang ang mga doctors ug nurses malipayon kaayong nag-ambak-ambak ug nag-luksolukso tungod sa nagkalainlaing party nga ilang tambongan.

Samtang ako nagping-it sa tumang kasakit sa panglawas.

Ato lang nga kanunay hinumdoman nga ang Diyos labaw kanato sa tanang higayon. Wala’y makabuot sa atong Maghuhukom kun unsaon niya ang mga kulon nga iyang gibuhat.