Hain na man sila?

Nahibaw-an nako gikan ni Ahmed Cuizon, ang regional director sa Land Transportation Franchising and Regulatory Board (LTFRB)-7, nga mikunhod g’yud diay og mga usa ka libo ka units ang mga taxi dinhi sa Sugbo.

Kaniadto kapin sa unom ka libo ka taxi units ang nag-operate sa Metro Cebu, apan human gipahigayon ang inventory sa tanang mga taxi atul sa pag-asumer ni Cuizon, ang gidaghanon miabot na lang og 5,063.

Hain na man kadtong ubang taksi nga kaniadto nagdagan-dagan? Sigurado ko nga kadtong maong mga sakyanan tingali wala na padagana sa ilang mga tag-iya kay kwestyonable man ang papeles o kaha mga gubaon na. Apan dili usab imposible nga dunay ubang mga taxi units nga gipanag-iya sa mapahimuslanong operator nga mi-duplicate ra sa body number ug plate number sa ilang mga sakyanan. Dili ba tinuod?

Akong awhagon kadtong mga drayber sa taksi nga nasuheto niini nga hatagi ko og inpormasyon. Ayaw’g ninyo labani ang inyong operator nga maayo lang mokumkom sa abang sa sakyanan.

* * *

Karong Disyembre 16, tangkud na nga usa ka tuig si Ahmed Cuizon sukad sa paglingkud niya pagka LTFRB-7 regional director. Gusto siya og kausaban ug kini mao nga mobalhin siya pag-opisina sa silong sa LTFRB regional office.

Gihatagan nako siya og ideya unsay maayong tan-awon kay dili imposible nga may iyang mga sakop nga nagbinuang. Gani usa ka sakop sa LTFRB gidungog na man nga nakapanag-iya og daku kaayong katigayonan nga lisud niya maangkon basi lang sa iyang sweldo.

Gipasabot ko ni Ahmed nga kun anha siya mag-opisina sa silong mahimong makapaniid siya sa kalihukan sa iyang mga sakop kay sa adto sa ikaduha nga andana nga daw susama ra nga nahimo siya nga buta sa kalihukan sa iyang mga sakop sa ubos.

Apan giangkon ni Ahmed nga tungod sa kakuwang niya’g mga sakop wala pa gayud niya matagad kining reklamo nga wala nila mahimoi og aksyon kining mga public utility vehicles nga anaa ra gi-grahe sa daplin sa karsada panahon sa gabii.

Ang lagda mao kini. Ang tag-iya mobutang g’yud og “sketch” sa iyang grahe sa iyang pag-apply og prangkisa sa sakyanan. Aw kun sa dukomento hitsas, apan kun adtoon nimo, walay grahe ang maong mga sakyanan. Mangita mo’g ebidensya?

* * *

Ang uban miingon nga ang mga gasoline service stations mahimo ra diay nga maoy himoong grahe sa mga awto, apan dili man diay. Bi, awhagon nako ang mga inspectors sa LTFRB nga susihon nila kining mga taxi nga anaa maghimo’g grahe sa gasolinahan eskena Juan Luna ug Archbishop Reyes Avenues.

Awhag nako ni Ahmed nga paspasan nato paghimo’g kampanya kay diha sa barangay Sambag 1 aw bisan sa ubang mga barangay, pwerteng daghana nga mga PUJ’s nga panahon sa gabii anaa ra giparking sa karsada.

* * *

Unsa ning akong nadunggan? Ang Customs police nga ania magbase sa dakbayan sa Sugbo ingon sa mangilog kuno og kredito niadtong pagkasakmit sa mga pyesa sa armas nga natiktikan sa laing Customs unit?

Kini maoy miabot nga inpormasyon kanako gikan sa akong mga kaila diha sa Aduwana. Ako kining tukion sa lindog nako sa The Freeman karong Martes.