EDITORYAL - Negosyante sa P2.7B nawala?

Niay negosyante'g buwawan nga may bayronong buhis nga P2.7 bilyones, Jesus ko, pagkangilngiga ning negosyanteha, wa man gyud ang-anga og di makaabot og binilyon ka pesos ang iyang buhis.

Apan ang labing ngilngig mao ang taga BIR kay gipaabot pa gyud og ingon niini kadako ang maong buhis una pa ipahibawo sa publiko.

Sa mga ordinaryong kawani nga di makatunol sa income tax return matag Abril, padad-an dayon og notice nga buot ipasabot wa nila katulgi sa BIR bisan gamay kaayo ang buhisanan sa kawani.

Apan sa mga negosyante, suma ning balitaa nga napatik sa pamantalaan, dinhi makita nato ang kaluag sa pagpaningil sa taga BIR sa maong magbubuhis.

Pagkadako na og mahimo niining P2.7 bilyones alang sa giplanong   proyekto sa kagamhanan sama sa livelihood , health, edukasyon, ug uban pang tabang alang sa daghan kaayong kabus nga wa nay makaon.

Unya ang maong negosyante wa na ra ba kuno igkita, busa nakapaukay sa daghan kaayong   mga katahap nga basin gipublikar lang kining maong balita aron lipaton ang publiko nga matawag nga for your eyes only.

Daghang natahap nga kun wa mangita og abag ang BIR sa mga otoridad sa kapolisan o kaha NBI sa paggukod sa maong magbubuhis, basin usa lamang kini ka drama.

Ambot kun tinuod ba kaha ang katahap sa uban nga basin mitunol kini og pila ka milyon ka pesos ngadto sa bulsa sa taga BIR unya ipadeklarar lang nga nawa siya, aw impas tuod ang tanan.

Hinuon kining maong balita napublikar na ug ang kadako sa maong kantidad di ta motuo nga piyongan lang kini sa gobyerno nga gani modaginot man kini sa tagsa lang kadiyot nga buhis sa makilimos aron lamang makahipos og kuwarta ang iyang panudlanan, kana pa kahang P2.7 bilyones? Di ba?