EDITORYAL - Bug-at ba ang sala ni de Lima?

Ang publiko nangutana kun unsa ka dako ang sala ni Kalihim Leila de Lima ngadto sa Korte Suprema sa iyang pagsupak sa mando niini nga pagawason sa nasud si kanhi Presidente GMA.

May mga tubag nga nagkanayon, di kaayo tantong bug-at ang iyang sala, tungod kay gipakita niya ang hustisya ug kaangayan alang sa tanan ug wala siyay gidapigan kundili gituman lamang niya ang balaod.

Kini tungod kay nakita ni de Lima ang daghang katarungan nga di angayang makagawas si GMA kun ang himuong basehanan mao ang iyang balatian, tungod kay mahimo ra man siyang magpatambal dinhi sa nasud.

Busa tungod kay ania ra siya sa nasud magpatambal, aw sayon ra kaayo niya ang pagpanubag sa mga pangutana sa korte bahin sa mga kaso nga gipasaka batok kaniya, busa way mga tawong nangita og hustisya nga makasukmat kang de Lima.

Apan sa bahin sa Korte Suprema nga nagtugot nga makagawas si GMA sa nasud tungod lang sa balatian sa lawas niini, sa way pagpakabana bahin sa kaso nga iyang giatubang, aw may due process bang mahitabo sa bahin ni GMA?

Ang gitawag nga due process maoy kanunay nga ising-al ug isinggit niadtong mga tawo nga silotan sa balaod nga di kahatagan og   higayon nga makapanubag sa mga pasangil nga gisang-at batok kanila sa hukmanan.

 Kun tugotan si GMA nga makagawas sa nasud samtang galingon ang iyang kaso sa hukmanan dinhi , ug mahukman siya sa silot nga di siya personal nga makapanubag sa pasangil nga gipat-ol kaniya, may due process ba alang kang GMA?

May gahum ba ang Korte Suprema o kadtong gustong palayason siya sa gawas nga modupa pabor kang GMA kun santakuhon na kini sa mga higanteng ebidensya nga magduot kang GMA ngadto sa kapildihan busa silotanan sa sala niyang nahimo?

Kay nakasiguro ba ang Korte Suprema nga huyang ang mga ebedensya batok kang GMA busa di lang nila kini togutang   makapanubag sa iyang kaso? Di ba?