Paglingi sa gigikanan

Ang presidente ug CEO sa usa ka pribadong korporasyon dinhi misaulog sa ika-50 anyos niya nga kalampusan sa natad sa business administration.

* * *

Lahi kun tagsaon ang naagi niya sa pagsaulog sa maong anibersaryo sa iyang kalampusan. Tungod kay wala kita makapangayo og permisyon nga suwaton ang iyang anibersaryo, ato lang pugngan ang iyang ngalan gawas sa paggamit og alyas nga Mr. Lopez.

* **

Giimbitar ni Mr. Lopez pipila sa suod niyang mga higala ug business associates sa dapit diin gihimo ang selebrasyon. Pag-abot sa mga bisita, ilang nakita si Mr. Lopez sa taliwala sa pilapilan, nagpurol lang ug naghubo sa iyang t-shirt.

* * *

Iyang gidaro ang yuta nga tamnanan og palay ginamit ang usa sa mga kabaw sa iyang amahan. Gihimo kuno niya kini aron paglingi sa iyang gigikanan.

* * *

Matud niya gamay pa siya nagdaro na siya sa ilang yuta. “Labihan namo ka pobre,” matud niya. “Kinahanglan gayud nga motabang pagtikad sa kaumahan.”

* * *

Mi-explain si Mr. Lopez nga iyang gihimo ang maong matang sa selebrasyon isip paglingi sa iyang kawad-on sa bata pa siya.