Kultura sa "wang wang"

”Tuwid na landas” maoy direksiyon nga gisubay sa atong gobyerno ubos sa pamunoan ni Presidente Aquino.

Sa hapit tanang pakigpulong sa presidente dili gyud masipyat ang iyang pagpahinumdom sa direksiyon nga iyang gisubay.

Apan nganong taliwa sa pagpunay og pahinumdom sa presidente daghan pa gihapon sa mga opisyal ug kawani sa gobyerno ang nagdumili pagsubay sa maong direksiyon.

Duna pa gihapoy mga opisyal nga pabiling nagbaton sa kultura ug pangisip nga “wang wang”.

Pipila nila mao ang hepe sa Customs Intelligence and Investigation Service dinhi sa Cebu Port nga si Bong Arevalo ug ang Visayas supervisor nga si Lyceo Martinez.

Ang duha giingong Miyerkules na kun dili Huwebes nga moabot sa ilang opisina. Ug magkalisud Biyernes na kuno nga mo-report sa ilang opisina sigun sa akong tinubdan.

Ang laing dakong kwestiyonable mao ang luho niini nga pagpuyo dinhi sa Sugbo. Motuo mo ug sa dili matag semana nga dia siya sa Sugbo giingong anaa ni mopuyo sa Radisson Blu Hotel.

Gawas nga nagpuyo sa mahalong hotel duol sa ilang buhatan luho ug mahalong sakyanan sab ang gigamit niini.

Usa sa akong higala nga nakahigayon pagsukmat kang Arevalo miingon nga gihimakak sa opisyal nga siya maoy nagpuyo sa Radisson Blu.

* * *

Daghan sa mga sakop sa kapolisan dinhi sa Sugbo ang girelibohan human masakpi ni Chief Supt. Marcelo Garbo nga wala magsul-ob og kumpleto nga uniporme.

Hugot man gud niya nga gipahimangno atol sa iyang paglingkod kapin na sa usa ka buwan ang milabay ang hustong pagsul-ob sa uniporme.

Suporta ko sa maong kampanya ni Garbo aron madisiplina ang kapolisan. Apan ang pangutana og husto ba nga iyang ilakip pagtangtang ang mga opisyal sa mga polis nga iyang nasakpan nga milapas sa lagda sa pagsul-ob og uniporme?

Matud niya tungod ni sa command responsibility. Asa man diay mohunong ang command responsibility?

Kun atong palapdan ang pagsubay sa maong doktrina di baya kapanghunaw si Garbo tungod kay iya man gihapon ning mga sakop.

Hinaut nga dili tinuod ang kasayuran nga akong nadawat nga ang hinungdan nga iyang gilakip pagtangtang ang mga opisyal mao nga usa nila bayaw diay sa iyang karibal sa pwesto ug ang uban napagan lang.

Ang laing hinungdan ug mas makapabalaka mao nga dunay kaugalingong mga tawo si Garbo nga gibitbit pag-abot niya dinhi sa rehiyon nga gusto niyang ibutang sa pwesto.

* * *

[email protected]