Ang kabililhon sa gugma

Usa nako ka higala nakighinabi kanako bahin sa iyang pamilya. Matod niya naglibog siya sa bugnaw nga pagtagad sa iyahang pamilya ngadto kaniya nga unta gihatagan man sila sa ilang tanang panginahanglan gani halos wala nay mahabilin sa iyahang kinitaan. Ako siyang gipangutana, apil ba diha BROD ang imong gugma ug panahon alang kanila? Nasagmuyo siya ug wala dayon makatubag.

Kadaghanan kanato nahikalimot nga kitang tawo wala mabuhi sa mga materyal nga aspeto lamang. Sa matag butang nga mahimo nato para sa atong pamilya ato kini nga giisip nga usa ka obligasyon. Nahikalimtan nato ang gugma nga maoy labing lig-on nga pundasyon sanglit pinaagi niini mabatonan nato ang kalinaw, kalig-on ug kahiusahan kung naa ang gugma anaa ang respeto ug pagsabot sa usa’g-usa. Ug kini maoy atong gamiton sa pagsungasong sa tanang hagit sa kinabuhi. Ato kining mabatonan pinaagi sa pagsunod sa gitudlo sa atong GINOO bahin sa gugma. Nga walay kinutoban kay matud pa bitaw "walay kapuslanan ang tawo kung wala siyay gugma" (1Cor.13.2)