Pagbudhi ni P-Noy
Gikompirmar sa tigpamaba sa Malakanyang sa miaging adlaw ang paghatag sa gobyerno sa Pilipinas og pundo isip “donation” kon hinabang ngadto sa Moro Islamic Liberation Front, ang grupo sa mga rebelding Muslim nga responsabli sa sunod-sunod nga pagpamanhig sa atong mga sundawo didto sa Mindanao karong bag-o diin kapin sa 20 ka mga sundawo ug polis ang nakalas.
Si presidential spokesperson Edwin Lacierda miingon nga ang P5 milyones nga hinabang gitunol ni Presidente Noynoy Aquino atol sa sekreto niyang pagpakigtagbo sa pangulo sa MILF nga si Al Haj Murad Ibrahim didto sa Tokyo, Japan niadtong miaging buwan.
Ang maong kwarta giingong saad sa miaging administrasyon nga gipadayon ni Aquino isip kabahin sa “confidence building measure” sa gobyerno paghatag og agianan sa negosasyon alang sa hingpit nga kalinaw didto sa Mindanao.
Ang kwarta gamiton kuno alang sa katukoran sa Bangsamoro Management and Leadership Institute diin adto himuon ang pagbansay-bansay sa umaabot nga mga lider sa rebelding grupo.
Ambot wala ba mayabag ang dagan sa panghuna-huna sa atong Presidente? Asa ka man makakita og gobyerno nga mogasto sa pagbansay-bansay sa mamahimong sunod nga mga lider sa iyang kontra?
Mura ta og nagpakaon og bitin nga maoy motukob nato sa umaabot. Kun kabahin ni sa “confidence building measure” unsa may gibugti sa MILF sa maong kantidad aron pagpakita nga sila usab sinsiro sa pagpakigsabot alang sa kalinaw?
Mao bay bugti sa MILF ang pagpamanhig sa atong mga sundawo didto sa Al-Barka diin 19 ang patay? Unsa may atong dag-anan kun gigamit sa MILF ang kwartang atong gihatag aron pagpamalit og bala ug armas batok sa atong mga sundawo?
Mura ta og gigisa sa atong kaugalingong mantika niini. Bisan pa og manghunaw ang administrasyong Aquino sa maong programa kay matud nila iya man ni kanhi Presidente Gloria Arroyo nga igo lang nilang gipadayon, apan nahimo siyang kabahin sa pagluib sa atong nasud pinaagi sa pagtugot nga ma-release ang pundo ngadto sa MILF.
Alang nako usa ka pagbudhi sa nasud ug sa katawhang Pilipino ang paghatag og hinabang, gamit ang buhis sa katawhan, ngadto sa mga rebelde nga nagtinguha paglumpag sa atong institusyon.
Nahibawo ko nga seryoso ug dili lalim ang pagtinguha nga mapalagpot ang usa ka presidente sa iyang pwesto tungod kay di sab ta kasiguro kun but-an ba ang mopuli. Apan angayan tingaling tun-an sa mga batid sa atong Batakang Balaud og dili ba maisip nga usa sa mga “impeachable offense” ang gibuhat ni Aquino nga pagpanghatag og pundo sa kaaway sa gobyerno.
Kay sa tinamban nga pagtan-aw sa usa ka uyamot nga magbubuhis usa man ka pagtraydor sa nasud ang pagtabang sa kontra niini. Isip usa ka yanong magbubuhis gibati ko nga mitraydor si Aquino sa katawhan tungod sa iyang paggamit sa atong buhis aron idonar ngadto sa mga rebelde.
Kini samtang ang atong kaugalingong mga sundawo nag-antos gani sa minus nila nga sweldo ug gubaon nga mga combat boots ug puhaw nga mga uniporme.
* * *
- Latest
- Trending
