Ang bagyo ug ang bagolbol

Human masayri sa kadagkoan sa departamento sa edukasyon gikan sa Pagasa Mactan nga ubos sa signal numero uno ug numero dos ang kinatibuk-ang lalawigan sa Sugbo, gipahibalo dayon niini sa publiko ang pagsuspenso sa tanang klase sa kindergarten, primarya ug sekondarya kagahapong adlawa. Ang ubang mga pribadong tunghaan misunod usab sa gihimo sa pampublikong tunghaan.

Samtang gisuspenso ang klase sa nahisgutang ang-ang sa basic education, gipanghigot usab sa taga Coast Guard ang mga barko nga mobiyahi sa mga silingang lalawigan sa Sugbo aron malikay sa peligro ang mga pasahero. Mao kini ang pipila ka mga panagana nga gihimo sa nahisgutang mga ahensiya sa gobyerno aron malikay sa disgrasya ug kahasol ang mga tinun-an ug pasahero.

Apan samtang gihimo sa gobyerno ang angay nilang himoon, naa gyod gihapoy mga tawo nga dili makasabot. Kaniadtong Miyerkules samtang naminaw ko sa radyo akong nadungog sa balita nga nangreklamo ang mga pasahero human higti sa Coast Guard ang mga sakyanang pangdagat nga ila untang sakyan. Ilang gibagolbol ngano kunong kun dagko ang bawod dili sila pugngan sa Coast Guard nga makalabigar unya karon hinoong porbidang linawa, wala sila palabigara. Aduna poy mga ginikanan nga nagreklamo kay ngano kunong gisuspenso ang klase nga unta linaw man ang panahon. Wala man gani kuno hangin ug ulan nianang pagka buntag. Tungod niini sigun sa naandan, ila na usab nga gibasol ang sayop nga pagbana-bana sa panahon sa taga Pagasa.

Porbida. Tungod sa atong kagustohan gusto na lang gyod natong isakripisyo ang atong kinabuhi ug kasiguroan. Usahay maglibog ko sa pipila kanato. Gani, dili kay ako lang ang naglibog, hasta upod ang atong mga ahensiya sa gobyerno ilabi na ang taga Pagasa naglibog upod.

Kun nasayop man ang taga Pagasa sa ilang pagbanabana sa dagan sa panahon angayan tang magpasalamat kay dili sama ka dautan sa ilang panagna ang nahitabo. Angayan tang magpasalamat nga dili kaayo kusog ang hangin nga gidala ni Ramon sa iyang pagbisita dinhi sa Pilipinas ilabi na dinhi sa Sugbo ug mga silingang lalawigan.

* * *

Ako diay nga pahalipayan ang among kaubang magtutudlo sa Social and Behavioral Sciences sa College of Arts and Sciences sa Southwestern University, si Doctor Vic Y. Saquilayan nga nagsaulog sa iyang adlaw’ng natawhan karong adlawa. Happy Birthday Doc Saqui.