Tubig sa lubi

Nagkalainlain kining gitawag nato og tunglo kon curse. Ang kumon kaayo mao kining mga pulong: Mamatay ka unta; magkamang ka unta sa sama sa bitin; madisgrasya ka unta; ug uban pa.

Apan wala ako masayud kun ang pulong "himatyon naman na siya" makonsiderar ba nato nga tunglo. Alang kanako depende kana sa pagsabot sa usa ka tawo. Mahimong makasulti siya niana agi og pagdaut sa usa ka tawo o nagsulti lang siya sa tinuod sigun sa iyang nahibaw-ang kahimtang sa gitumbok niyang tawo.

Kita nasayud nga sa politika walay pugongpugong sa sinultihan nga kadaghanan gani libelous na kaayo. Sumala sa mga abogado nga ang mga tawo nga mosulti nga, " Wala o ubos kaayo siya og IQ" ug "Siya ang labing bati nga mayor nga nakasilbi sa Cebu City " mahimong makiha og libel. Apan gi-uran-uran ra man kini paglitok sa mga politiko. Sigun pa sa mga bata nga way sukod sa bawos. Way hilakay.

* * *

Hapit tanang parte sa lubi magamit sa tawo. Ang punuan niini magamit nga coco lumber samtang ang tukog mahimong silhig ug muwebles. Ang dahon maoy iputos sa puso ug gamitong bongbong sa balay samtang ang palwa magamit nga sugnod apil na ang mga butay niini. Ang tuba sa lubi maoy nag-unang imnonon sa kalungsuran ug mga barangay dinhi sa Sugbo ug gihimong suka. Gigamit usab kini isip parenteral solution kon gitawag sa kadaghanan nga puli sa dextrose.

Ang wala masayri sa kadaghanan nga ang tubig sa lubi himalitan na karon sa ubang dapit sa kalibutan labi na sa Estados Unidos. Ang Pepsi Corp. ug ang New York City-based coconut beverage manufacturer Vita Coco ug ang ilang partner dinhi sa Pilipinas ang Fiesta Coco Equity (FCE) naggamit sa tubig sa lubi isip hulip sa carbonated sodas nga gigamit sa nagkalainlaing soft drinks.

Ang FCE misaad kang Pres. Aquino, samtang nibisita siya didto sa US , nga mobobo sila og $15 milyones alang sa pagpamupo ug pagpananum og lubi dinhi sa Pilipinas. Wala pa hinoon ipahibalo sa Pepsi Corp. kun pila ang ilang ipuhunan alang sa lubi bisan kun ila nang gipasalig sa presidente nga interesado sila sa pagpalit og lubi dinhi sa nasud.

 Sa dili madugay momahal na ang presyo sa botong sa lubi apan ang makaayo niini kay dili na ahaton sa pagputol ang mga punuan sa lubi aron himoon nga lumber.

* * *

Sumala ni US Ambassador Harry K. Thomas nga hapit katunga sa mga turista moanhi sa Pilipinas tungod sa sex tourism kon aron makighilawas sa mga Pilipina.

Dili ako motoo nga mosulti si Ambassador Thomas niini kun wala siyay gihuptang dokumento kay kining mga embahador mabinantayon kaayo sa ilang ipanulti.

Dugay na kitang nasayud nga ang mga turistang Hapones moanhi dinhi tungod sa atong mga babaye. Ang mga Amerikano dili man tingali moanhi alang sa atong mga mugbo og lupad nga kababayen-an apan alang sa ilang mga ka-chat sa internet nga mahimo nilang uyab. Siyempre, kun magkita na sila sa ilang uyab sa internet, eyeball to eyeball, unsa pa may ilang buhaton?

Angay lang hinuong magbantay ang atong kababayen-an kay daghan kamo nga ilang giuyab nga ilang bisitahon dinhi aron pahimuslan. Aduna hinuoy swertihon nga minyoan gayud sa mga langyaw. Apan mao kini gitawag nga swerte de kusahos kay himoon man lang usab silang mora'g maid niining mga langyaw. Mao kini ilang gitawag nga human washing machine nga pwede usab nilang kabay-an.

* * *

Mga pahalipay ngadto sa Task Force Cancer of the City of Cebu nga pinanguluhan ni Dr. Lucelle A. Mercado sa ilang pag-relaunch sa Anti-Smoking Campaign niadtong Oktubre 1. Daku kaayo kini'g matabang sa pagminus sa cancer sa tutonlan ug sa baga. Si Dr. Lucelle A. Mercado buot lang gayud motabang sa katawhan agi og pasalamat niya sa mga grasya nga gihatag sa Dios kaniya ug sa iyang pamilya. Nagpaluyo kanimo ang katawhan Dr. Mercado. Padayon!

* * *

Belated birthday greetings ngadto kang Barangay Kasambagan (1st) Konsehal George Chang nga nagsaulog sa kasumaran sa iyang adlaw'ng natawhan niadtong Sept. 30. Ako nakadayeg kaniya tungod sa iyang prinsipyo. Salamat diay sa imong paghangyo kang Mayor Mike Rama sa pagpatapak sa mga libaong sa kadalanan sa Villa Aurora.

* * *

Email: [email protected]