Tigdala'g shabu

Angay gayud nga hugtan pag-ayo ang pagbantay sa atong tugpahanan sa abyon ingon man sa atong mga pantalan aron nga mapugngan ang pagpayuhot og gidili nga matang sa drugas dinhi sa ato.

Gisuginlan mi kagahapon ni Arnel Pura, special investigator sa National Bureau of Investigation (NBI) kun giunsa pagtago ang tulo ka kilo nga shabu nga buot unta nga ipayuhot dinhi sa Sugbo agi sa Mactan Cebu International Airport.

Nahinumdom mo sa usa ka babaye nga Kenyan national nga nadakpan? Si Customs-Mactan Collector Paul Alcazaren ug Cebu Customs Collector Ronnie Silvestre nalipay kaayo kay wala makalusot ang shabu dinhi sa Sugbo. Ang NBI-Manila maoy naghatag og tip sa ilang mga counterparts dinhi sa Sugbo nga dunay moabut nga shabu. Ngilngig kaayo ang pagkatago sa shabu kay kun imong habwaon ang mga butang sa luggage, dili makit-an ang shabu didto sa lubot sa bag.

Giukab diay ang ilawom sa bag unta didto gipasok ang maayo kaayo pagkahapnig nga shabu, ginipis g’yud aron dili mabantayan. Apan nakatabang gayud nga masakpan ang drugas pinaagi sa usa ka drug-sniffing dog.

Basi sa inpormasyon nga ang maong babaye nga Kenyan national sugaton ra og tawo dinhi sa Sugbo aron kuhaon ang maong drugas.

* * *

Nagtoo g’yud si Cebu City Assistant Prosecutor Mary Ann Castro nga kauban ra niya sa trabaho ang nagbuhat-buhat og report nga kunohay nagdoble siya’g kobra og transportation allowance gikan sa dakbayan sa Sugbo ug sa ilang kahugpongan.

Gipasanginlan man gud si Castro nga kun motambong og lainlaing kalihukan sa ilang kahugpongan nagkobra siya og transportation allowance ug ubang gastohan gikan sa City Hall ug kobra usab sa ilang kahugpongan sa mga prosecutors.

Apan gipanghimakak kini ni Castro kay samtang giangkon niya nga nangayo siya’g reimbursement sa uban niyang gasto gikan sa dakbayan sa Sugbo, ang maong refund nga iyang gipangayo wala niya pangayoa sa ilang kahugpongan.

Ang iyang argumento mao nga pulos orihinal ang iyang mga resibo nga gisuporta sa iyang pagpangayo’g refund. Na hala, bahala na ang City Legal Office nga motan-aw niini.

* * *

Angayan ba gud puy-an ang mga tunghaan sa pipila ka tawo nga gitugyanan pagbantay? Kana ba nga gitawag og mga caretakers.

Wala man gud makagusto niini si Mayor Michael Rama kay ang tunghaan kuno dili g’yud angay’ng puy-an. Pero alang kanako kaniadto tingali mahimong dili kinahanglang puy-an, apan karon mora’g kinahanglan na g’yud.

Kini tungod sa kadaghang kawatan nga kun walay magbantay aw siguradong mahurot sa pagpangawat ang mga butang sa tunghaan. Apan ang maayong buhaton mao nga kadtong tugyanan sa pagbantay, dili lang kaayo magpa-display.

* * *

Sa operation sa LTO kaniadtong miaging gabii, daghan g’yud nga mga drayber nga pwerteng makahangyo nga dili lang sakmiton ang ilang lisensya. Wala pa gayud mausab ang ilang pagka paraygon kun madakpan apan gahi’g ulo.

Kun pangutan-on nganong nag-sinelas nga nag-drive, moingon nga naay samad ang tiil bisan wala. Kun pangutan-on nganong wala magsul-ub sa uniporme, gihukas kuno kay init.

Sa laktud, pulos g’yud duna sila’y rason kun madakpan na. Angay ba sila nga kaloy-on? Alang nako, kaloy-on gihapon, apan dili kay mahimo nga dili na lang gayud sakmiton ang ilang mga lisensya.