EDITORYAL - Ang bahad ni P-Noy

Mibahad si Presidente P-Noy nga sa 2012 may mapriso na sa mga nangiriw sa salapi sa gobyerno ilabi na ang mga opisyal sa miaging administrasyon.

Di baya ni matawag nga usa lang ka yano nga hulga , tungod kay opisyal kining gipahayag sa Presidente bisan asa siya mamulong ug bisan kinsay kaatubang niya ug ilabi na kun mga magbubuhis nga Filipino ang anaa sa iyang atubangan.

Ambot kun ngano ba usab nga ang tawo nga ganahan man gyud manghilabot sa mga butang nga di ila nga ang tinuod kining mga butanga nga nia sa kalibotan pulos temporaryo ug lumalabay lamang.

Busa kun moumento ka sa kinabuhi tungod kay nangawat ka, inigkamatay nimo asa ang imong kinawat.

O tinuod nagtuo ka nga moharuhay usab ang kahimtang sa pagpuyo sa imong pamilya, apan ikaw    sa imong pagka-ikaw nga maoy nagpasiugda   sa maong binuang    di ba hasulon sa imong tanlag.

Apan ang labing pait kun   sa imong pagpangawat batan-on ka pa nga masilotan, o naa kana sa talisawop nga edad , unsa kaha kasakit ang imong bation nga magsud-ong sa imong kinawat nga maoy nakapabilanggo kanimo ug wa nimo mapahimusli sa hingpit.

Apan kun makuwartahan ka nga gumikan sa imong maayong paningkamot   sa limpyong paagi, pagkahapsay sa imong kinabuhi ilabi na kun napalgan mo ang tinuod nga dalan nga gitudlo sa Dios nga pasubayan kanimo aron makaabot ka sa bag-ong langit ug bag-ong yuta diin tua didto ang tinuod kay kalipay nga way katapusan.

Pobre   ka man ug tinamay apan anaa ka sa grupo sa mga tawong pinili sa Dios ning katapusang mga adlaw ikaw ang labing malipayon pag-abot sa adlaw kay nahisulat na “pinaagi sa mga kalisdanan kinahanglang mosulod ka sa gingharian sa langit” ug kini hapit na. Di ba?