EDITORYAL - Salamat sa IBP ug KBP

Ang tagdumala sa Banat News mapasalamaton kaayo sa atong taga IBP ug KBP ug uban pang grupo sa mga maalamon nga misimpatiya sa kawsa ning pamantalaan batok sa lakang sa pagpamiit nga gihimo sa pipila ka mga departamento sa atong kagamhanang local.

Ang Banat Edtorial sa miaging Agusto 17, 2011, naghatag lang og pahinumdom nga ang lakang sa pagpatak-op sa Banat News ug sa Super Balita nahisimang na sa hustong tuno ug lagda sa balaod.

Tungod kay kun matuman ang minangtas nga  pagpanggukod nga mugna lang sa pipila ka hunahuna sa mga tawong anaa sa kagamhanan, nagpasabot nga giyatakan nila ang kagawasan sa pamalita o impormasyon tungod kay matag adlaw giyagyag ning maong   mga pamantalaan ang mga balita nga gikinahanglan sa katawhan.

Giyatakan ang kagawasan sa pagpamulong ug pamahayag tungod kay matag adlaw ang mga inila og tinahud sa katilingban nga mga maglilindog o kolumnista ania sa maong mga pamantalaan nga kun sutaon mas daghan ang mga tigbasa nga masa sa katawhang nahigugma sa mga Sinugboanong pinulongan.

Giyatakan ang tumong sa paglingaw sa hunahuna sa tawo pagwagtang sa makadiyot sa mga kalaay ug kabug-at sa   mga sulirang usahay mohadla sa hunahuna sa katilingban tungod kay ania sa maong mga pamantalaan ang mga balita bahin sa artista, mga sugilanon nga mugna sa mga imahinasyon sa tagsulat , balita sa paugnat sa kusog ug uban pang mga kasayoran nga gikinahanglan sa publiko matag  adlaw.

Busa mao ni ang magusbat nga mga katungod sa maong mga pamantalaan nga makalusno sa industriya kun ang tanang hunahuna susama ra sa mga naglaraw nga patak-opan ang maong mga pamantalaan gumikan lang sa usa ka bahin niini sa mga sugilanon nga giisip nilang law-ay ug supak sa balaod nga sayon ra kaayong makurihian sa inamigo ug hinagala nga paagi.

Busa sa mga misimpatiya ug mibati sa kasakit sa mga hulga nga nadawat sa Banat News, among gitunol kaninyo  ang maong kinasingkasing nga pasalamat nga angay lang. Di ba?