EDITORYAL - Hain na ang ganti?

Daghang nangutana kun kinsay nakadawat niadtong gitanyag nga P100,000 nga ganti sa makatumbok sa suspetsadong midagit ug mipatay kang Ellah Joy Pique.

Kisaw ug baniog kaayo tong maong kantidad niadtong pagkasikop nila ni Karen Castro Esdrelon ug sa iyang uyab nga si Sven Eric Berger.

Nagtuo man gani ang kadaghanan nga pag-ulbo gyud sa balita nga may ganti ang makasikop sa suspetsado sa kaso ni Ellah Joy nag-inilogay ang taga Mactan International Airport ug ang kapolisan sa pagsikop kang Esdrelon ug Berger kay makapanigarilyo na sila sa P100,000 nga ganti.

Sukad makabuhi sila si Esdrelon ug Berger nahanaw daw aso ang giingong ganti, aw malagmit giatras siguro sa nagtanyag sa maong ganti .

Niadtong higayona , nabaraw man to kay wa man ma-probahi nga si Esdrelon ug Berger maoy mga kriminal sa batang 6 anyos.

Karon hinuong sakar na kaayo ang maong ganti kay gi-wanted naman si Bella Ruby   Santos, human mosibat sa wa pa ikapagawas ang orden de aresto batok kaniya ug sa iyang uyab nga langyaw , namingaw ang maong tanyag nga ganti.

Maayo man unta tong may padangog nga ganti kay bisan ang iyang mga ginikanan , mga igsoon , mga higala ug labaw sa tanan  di niya paryente ug di kaila, maningkamot nga masikop ang maong dakponon aron sila makasapi.

Sa bahin sa iyang mga tagtungod, aw maayo nalang kaayo nga anha kanila mahipunta ang maong ganti kay sa adto kini sa laing mga tawo.

Apan may ganti man ug sa wa, mas maayong di ililong ngadto sa mga otoridad ang nahimutangan ni Santos aron ikatugyan siyang malinawon ngadto sa mga otoridad.

Kay pananglitan di gyud ni madakpan, delikado kaayo ,nga kun tinuod mang siyay midagit ug mipatay kang Ellah Joy, sa umaabot nga mga adlaw ang inyong mga anak basin maoy isunod pag-ihaw. Di    ba?