Nganong taxpayers'money man gyuy ipamalit og condom?

Hilabihan pangugat gyud nila nga mapasar ang RH Bill. Kaylagi, alang nila, bahala na’g magpadayon ang corruption, basta makontrolar ang pagpanganak, mao na kini ang kasulbaran sa kagutom ug kawad-on sa Pinoy.

Busa, samtang moingon sila nga kinahanglan ipalambo ang free choice ug hingpit nga kagawasan sa magtiayaon kun pilay ianak, ug kanus-a mamabdos, at the same time, maghimo sila’g balaud aron i-imposed sa katawhan kun pilay ianak, ug kun unsaon nga dili mamabdos.

Unya, alang ning maong programaha, kinahanglan ang lungsod maoy pagastoon pagpamalit og mga condom ug ubang matang sa contraceptives. Ngano man? Di ba mahimo nga inay ipalit og mga condom ug contraceptives, ato ning gamiton pagpamalit og bugas o pagpausbaw sa rice production; pagpamalit og tambal ug pag-upgrade sa kahimanan sa mga government hospitals; pagtukod og mga tunghaan ug pag-produce og enough books alang sa tanang nagtungha sa mga public schools; pag-relocate ug pagtukod og kabalayan sa mga squatters nga karon ila nang ginganlan og mga informal settlers, aron monindot paminawon; ug daghan pang angayan hatagan sa unang mga pagtagad sa gobyerno.

Nganong i-priotize man gyud ni Noynoy ang pagpamalit og condom? Alang nako, i-intensify pag-ayo ang education. Edukahon ang mga Pilipino bahin sa population explosion, nga kun pobre ta, di kinahanglan daghan og anak. Nga sagrado ang lawas sa tawo. Nga templo kini sa nag-create sa lawas, busa dili angay panamastamasan. Nga ang sex, tungod kay gama sa Ginoo, is always safe and good.

Ang pag-edukar sa katawhan, ug paghatag og assistance ngadto sa nagkinahanglan bahin sa population, waa magkinahanglan og balaud. Usa sa nakaingon sa atong kawad-on mao ang unemployment. Maoy hinungdan nga magkalingaw na lang ang mga unemployed ug under-employed pagpanganak.

Ang solusyon niini mao ang paghatag kanilag laing kalingawan .. trabaho. Maka-provide ba ang gobyerno niini? Lagmit dili, kay ang ilang bugtong solusyon condom ra man. Moy gidangat!

Daghan konong mga inahan ang mangamatay gumikan sa dili hustong pagpanganak, kay lagi, pobre. Unsa may solusyon? Igong medical assistance gikan sa gobyerno. Maka-provide ba ang gobyerno ini? Lagmit dili, kay ang bugtong nilang solusyon mao ang condom.

Kun di gyud kalikayan ang paggamit og condom, di kinahanglan nga si Poor Juan de la Cruz ang atong pagastuon. Perhaps, ang mahimo sa gobyerno mao ang paghatag og discount sa atong pagpalit og condom.

Akong usbon, nganong ako man ug akong mga silingan ang pagastuon pagpamalit og condom? Di ba mahimo nga i-deduct lang ni gikan sa ilang mga commission ug kita’ gikan sa overpricing?

Pastilan, naunsa na man ta ini, Dro?