Tito, tita, mag-aral kayo ng mga salitang Gen Z

“PARA sa henerasyon n’yo, ano ang ibig sabihin ng ‘tito’ at ‘tita’?” Tanong sa akin ni Ms. Rellzah, 22, Gen Z partner ko sa Sapol-DWIZ. Siyempre, sagot ko, ang tito ay kapatid na lalaki at tita ay kapatid na babae ng magulang ko: “Bakit iba na ba ang kahulugan sa mga Gen Z?”

“Iba na,” ani Ms. Rellzah. “Ang ‘tito’ at ‘tita’ ay mga pang-uri sa gawi o ugali.” Halimbawa: Kapag ayaw nang mag-party at puro upo na lang ang edad-30, tito o tita na siya.

Sa America nag-iba na rin ang kahulugan sa Gen Z ng “cloud (ulap)”. Ito raw ay “pang-ulan sa halaman”. Ang alam natin, batay sa agham, nagtataglay ng ulan ang ulap. Pero para sa bagong henerasyon ang ulap ay may tungkuling magpaulan.

Maraming bagong salita ang mga Pilipinong Gen Z, ani comm. Benjamin Mendillo ng Komisyon sa Wikang Filipino.

Nariyan ang “boogsh”, ang dating “bongga”. “Estetik”, tao o bagay na kaakit-akit, halaw sa “aesthetic” sa English. “Dog­show”, ginagawang katatawanan ang isang tao o bagay. “Lavarn”, inartehang “laban”. “Omsim”, binaliktad na “mismo”.

Natuwa ako sa “awit”, ibig sabihin sa Gen Z ay “aw, ang sakit”. Gusto ko rin ang “eguls”, o “lugi”.

Isasama raw sa diksyunaryo ang mga bagong salitang­ Gen Z, ani Mendillo: “dasurv”, para sa “deserving”; “push mo ‘yan”, para sa ipagpilitan mo; “mekus-mekus”, o “halo-haluin”; “bet”, o “gusto”; “maritess”, o “tsismosa (mare, ano’ng chismis)”.

Pumasok sa Oxford Dictionary ang “rizz”, Gen Z English para sa “charisma”, at “sus” o “suspicious”.

Manginginom ang mga Baby Boomers, Gen X at Gen Y kaya tiyak ako na gagamitin nila ang salitang Gen Z na “shot puno”, o “tagay na puno”. Tapos, sa dami ng tagay, “walwal na”, o “lashing na lashing”.

Ganyan ang wika, buhay na buhay lalo na sa kabataan.