Kinsa ang mabasol?

Kadtong mga tag-iya’g kabalayan daplin sa Mahiga Creek ug sa ubang kasapaan nga nakadawat na og financial assistance gikan sa dakbayan sa Sugbo aron sila mobalhin ayaw na kamo pagbagolbol kun panggub-on ang inyong mga balay karong panahona.

Gitug-anan ko ni Noel Artes, kanhi hepe sa Division for the Welfare of Urban Poor ug karon pangulo sa Squatters Prevention Encroachment Elimination Division (SPEED) nga dunay 91 ka pamilya nga gihatagan na kaniadto sa dakbayan og cash assistance apan wa mopahawa.

Matud ni Artes nga ang City Hall atul sa termino ni kanhi mayor Tomas Osmeña migasto og kapin sa P910,000 kay tag P10,000 man ang gihatag nga hinabang sa mata’g usa ka pamilya isip bugti nga gub-on ang ilang balay daplin sa kasapaan.

Si Atty. Collin Rosell nga maoy bag-ong hepe sa DWUP mihulagway sa maong mga pamilya nga maisip na nga “professional squatter” mao nga gihagit nako ang abogado nga ipangkiha niya ang mga hingtungdan.

Samtang gatan-aw mi sa hulagway sa Mahiga Creek nga gipakita ni Alvin Santillasa, executive officer sa City Disaster Coordinating Council (CDCC), nakapanglingo-lingo ko tungod kay may kabahin sa sapa nga migamay na g’yud kaayo tungod sa mga abusado.

Unsaon, nga ang ubang nagpuyo daplin sa sapa mitukod man og riprap aron nga molapad ang ilang lugar. Sa ato pa, milapad tuod ang kabahin sa ilang balay apan migamay ang agianan sa tubig.

Naa pay mga gitukod nga tulay nga nagdugtong sa usa ka tampi sa sapa ngadto sa atbang nga tampi. Gimando ni Rama kagahapon nga panggub-on kining maong mga tulay-tulay ug putlon ang mga tubo sa tubig kun gikinahanglan aron mapadali ang dredging.

Alang kanako, dili na angay’ng hatagan og salapi kadtong mga tag-iya sa balay nga apektado lang sa paglimpyo sa tres-metros gikan sa tampi kay dili man hutdon pagguba ang ilang kabalayan.

Kadto hinoong pipila sa 35 ka pamilya nga gihurot gayud pagguba sa SPEED ang ilang kabalayan sa sitio San Isidro II, Mabolo, alang nako maayong hatagan sila og financial assistance.

Apan nagtoo si City Administrator Jose Mari Poblete nga walay gana moangkon og relocation sites ang maong mga pamilya kay samtang gihatagan na sila og application forms aron maka-avail og housing lot apan ang hingtungdang pamilya wala man gayud moadto sa DWUP.

Si kanhi mayor Tomas Osmeña miisyu na og demolition order kaniadtong Septiyembre 2, 2008 aron gub-on ang kabalayan sa 32 ka urban poor families nga nagpuyo sa Mahiga Creek.

Apan wala lang kini mapatuman kay unsaon nga si Mabolo barangay captain Rey Ompoc nagsigi man og “dupa-dupa” ug milampos gayud pagkombinsir ni Tommy nga dili idayon ang demolisyon.

Tungod niining maong dukomento nga gipresentar ni Rama nakatuo ko nga ang maong mga pamilya nahatagan na diay og financial assistance sa City Hall atul pa sa termino ni Tommy apan wala lang gayud mamahawa sa maong dapit.

Natan-aw usab nako nga ang uban sa maong mga apektadong lumulopyo dunay balay sa laing mga lugar apan mitukod ra usab og balay diha sa daplin sa Mahiga aron makabaton og negosyo.