Nahimo man lagi?

Tan-awa, bisan sa kabag-o pa ni retired police Colonel Ranulfo Sebusa sa pagdumala sa Bantay Dagat Task Force apan nakaangkon dayon siya og kalampusan.

Dul-an sa duha ka tonelada nga mga isda nga nakuha sa dinamita ang nasakmit sa mga sakop sa Cebu City Bantay Dagat task force dihang gidunggo kini luwan sa usa ka barko diha sa Pier 2 gikan sa Zamboanga City. Gibalik-balik na nako kaniadto pa nga kun molihok lang lagi g’yud, daghan kaayo ang mga dakponon. Mao kini nga dihang si retired Army Colonel maoy nagdumala sa Bantay Dagat task force niadto wala gayud siya makaangkon og pagdayeg kay wala man siya’y daghang kalampusan.

Pag-asumer ni Kernel Sebusa sa katungdanan hulip ni Enriquez mga duha ka semana ang milabay ako g’yud siya nga gihagit nga motrabaho gayud nga matupngan niya ang trabaho kaniadto ni Elpidio “Jojo” dela Victoria.

Usa ako sa gitawag pag-una ni Kernel Sebusa dihang gisusi na nila ang kargamento nga isda luwan sa M/V Zamboanga Ferry kaniadtong Huwebes sa gabii.

Nakaingon ko nga wala gayud masayop si Mayor Michael Rama sa pagpili ni Sebusa nga maoy padumalahon sa Bantay Dagat task force. Lauman nato nga mopaspas pa si Sebusa sa paghimo’g kampanya batok sa mga isda nga kuha sa illegal nga paagi ug itumod dinhi sa Sugbo.

Tambag ni Sebusa ngadto sa mga negosyante’g isda nga ayaw na lang mo’g panimpalad pagpadala’g mga isda dinhi sa Sugbo kun kini nakuha sa dinamita kay kun masakpan alkanse g’yud kaayo mo.

Dili makadaut sa tawo kun gamiton ang mga isda nga nakuha sa dinamita apan gihimo kini aron pag-discourage sa mga mangingisda nga mogamit sila’g dinamita sa pagpanagat.

Sa pagamit gud og dinamita sa pagpanagat maapil man sa pagkamatay ang mga gagmay’ng isda ug anugon kaayo kay biyaan ra man nila.

Dasigon nako si Kernel Sebusa nga mopaspas pa sa paghimo’g kampanya batok sa mga gukdunon sa balaud. Saludo ko nimo Sir!

* * *

Tinuod g’yud, kun dili mahusay ang panagsungi nila ni Mayor Mike Rama ug ni Kongresista Tomas Osmeña, magkabuwag-buwag ang mga konsehal sa umaabot nga eleksyon unya sa 2013.

Nakaila ko kun kinsa sa mga konsehal sa atong dakbayan nga “die-hard” kaayo ni Tommy, ug maila usab nimo kinsa ang pabor ni Mike. Aw natural si Konsehal Edu Rama adto g’yud suporta ni Mike kay paryente gud sila.

Kun mahitabo nga magkasangka sa politika sila si Rama ug Osmeña unya sa 2013, alegre gayud lagi kaayo ang eleksyon. Pulos sila mga lig-on nga kandidato.

Tan-aw nako, dili na gayud magkauli pa ang maayo nila nga kabubut-on kay mitataw na si Tommy nga dili na niya suportahan pa si Mike sa eleksyon. Kun ako ang pagbut-on gusto nako nga magkauban gihapon sila si Mike ug Tommy sa sunod eleksyon. Apan unsaon nga nagkasumpaki man ang ilang pamaagi pagdumala sa kagamhanan.

Maayo tingali Mayor Mike nga hatagan na lang nato og tag P5,000 nga cash assistance kadtong mga pamilya nga kompleto g’yud nga maguba ang ilang balay sa nagpadayong demolisyon diha sa Mahiga Creek.

Unya, bantayan na gayud nato nga wala nay makatukod og balay diha sa sapa ug sa three-meter easement. Kun may motukod, ato dayong gub-on.