EDITORYAL - Plaza Independencia nindot na

Ang Plaza Independencia usa sa makasaysayanong lugar ning dakbayan sa Sugbo sa di madugay hingpit nang mahuman ang pagpatahom niini.

Nindot ug madanihon ang mga kausaban uban sa mga binag-ong dayan-dayan , nga labing mipaanindot sa iyang palibot.

Usa ka dapit nga di angayang hugaw-hugawan sa mga manuroy sa maong lugar uban sa mga tindahan nga maoy mohatag og kalaksot pagbalik sa maong dapit kun itugot pa sa kagamhanan ang sidewalk vendor niini.

Apan di ba kaha kini mahimong suroyanan na usab sa mga tulisan, mangunguot, esnatser ug uban pang kriminal kun sa higayong mahuman na kini, pasagdan lang gihapon sa kapolisan nga gawasnong lugar alang sa tanang matang tawong dautan.

Sa wa pa mahunahunai sa mga opisyal sa kagamhanan sa dakbayan nga patahomon ang maong dapit, usa ka lugar nga delikado ug peligro kaayong suroyan magabii ang Plaza Independencia.

Tungod kay walay guwardiya, nahimong pahungawanan sa mga mag-uyab nga way ikabayad og motel ang mga kalibonan sa maong plasa kaniadto.

Unya ang mga kriminal usab di lamang kuwarta ang tulison gikan sa ilang mga biktimahonon kundi bisan ang mga babaye, ilogon ug pahimuslan gikan sa mga uyab niining mga lalaki nga hulgaon ug padaganon   sa mga kriminal.

Ambot kun mao lang gihapon ang buhaton sa kagamhanan, nga inighuman nga mapatahom pag-ayo ang maong plasa, pasagdan lang gihapon kini nga way guwardiya, maadlaw ug magabii, ah, way kapuslanan ang minilyon ka pesos nga buhis sa katawhan nga gigasto sa pagpanindot niini.      

Kay kun delikado mang suroyan sa mga taga dinhi ug lumad nga taga Cebu, mas kuyaw ilabi na niadtong mga dumuduong, malangyaw man o taga dinhi ra sa palibot sa nasud ang maong dapit. Di ba?