Nganong karon lang?

Kaniadtong miaging semana gipasaka na gayod sa buhatan sa Ombudsman ngadto sa Sandiganbayan ang kasong Plunder batok nila ni kanhi Agriculture Secretary Luis Lorenzo, Undersecretary Jocelyn Jocjoc Bolante, Assistant secretary Ibbara Poliquit ug uban pang mga tag-as nga opisyal sa nahisgutang buhatan sa gobyerno apil usab ang pipila ka pribadong mga indibiduwal.

Ang kasong plunder may kalambigitan kini sa 728 milyones ka pesos nga pundo para abuno sa umahan sa mga mag-uuma nga gigamit sa pagpamalit og boto sa kandidatura ni kanhi pangulong Gloria Macapagal Arroyo ug kaubanan sa partido atol sa 2004 nga piniliay.

Ang maong anomaliya nabisto human magreklamo si kongresista Teddy Boy Locsin sa Makati dihang nakita niya ang iyang pangalan sa listahan sa mga nakadawat og pundo sa abuno bisan wa siya makadawat niini. Mas labaw pa gyod nga nagreklamo ang mga mag-uuma kay ang giingong abuno para kanila wa gyod nila makit-i ug mahikapi. Samtang ang pananom ug umahan sa mga mag-uuma nangginiwang kay wa gyod makatilaw og abuno, nanambok usab pagmaayo ang mga kandidato ni Gloria Macapagal Arroyo tungod sa pundo sa abuno nga gigamit sa ilang kandidatura.

Human mahinanok sa ilang pagkatulog nahigmata ra gyod ang buhatan sa Ombudsman. Human molabay ang pito ka tuig nga pagpinaabot sa katawhan napasaka ra gayod ang kasong plunder batok sa mga hanggaw nga opisyal sa gobyerno. Pero nganong karon lang mapasaka sa Ombudsman ang kasong plunder batok sa nahisgutan nang mga opisyal? Tungod ba kay gipa-impeach na  si Ombudsman Merceditas           Gutierrez?

Sa unom ka Article of Impeachment batok kang Ombudsman Gutierrez, usa ang 728 milyones ka pesos nga Fertilizer Fund Scam. Busa ang pagpasaka og plunder batok sa mga kanhi opisyal sa departamento sa agrikultura pang alkontra lamang ni Ombudsman Gutierrez sa impeachment nga iyang giatubang.     

Gikinahanglan pa diay nga i-impeach ang Ombudsman aron sila momata sa ilang pagkahinanok sa pagkatulog.