Raket sa developers

Royale Cebu Estate, Consolacion—Kun nakapalit na ka og luna ug nakatukod na og bay sa usa ka subdivision pagkahibawo nga giilad diay sa developer, unsa man ang imong mahimo? Ang labing una nimong dangpan mao ang Housing and Land Use Regulatory Board (HLURB), nga may buhatan sa gobyerno nga gitahasan pagbantay sa tanang subdivision projects ug pagpatuman sa mga lagda sa relasyon tali sa developers ug homeowners.

Apan inig abot sa HLURB, way motarong pag-atiman nimo. Ipasa-pasa hangtod nga pul-an og pinaabot. Kun mangisog, mug-ot ang dagway sa mga moatubang nimo. Ug kun makahinumdom pa pagpaningil hain nang mga gisaad sa developer, ingnon ka lang nga way subdivision plan nga nasumiter sa ilang buhatan.

* * *

Mao ni ang masulob-ong hulagway sa kasagaran sa subdivisions sa Sugbo karon. Nagpatuyang lang ang developers pagsaad sa buwan ug mga bituon ngadto sa mga gikumbinser pagpamalit sa ilang mga luna. Kun mahalin nang tanan, di na igkita ang developers ug lupig si Pilato sa kaabtik sa HLURB sa pagpanghunaw.

Suwayi og suroy ang rehiyonal nga buhatan sa HLURB sa Central Visayas. Ug hilak. Wa sila’y gihuptan nga tarung mga dokumento sa imong subdivision. Wa sila’y kasayuran nga wa diay mahatag sa developers ang ilang gisaad nga amenities. Labaw sa tanan, way bisan usa nga interesado nga motabang ug mogiya nimo.

* * *

Mao nga nagkinahanglan ka og takos, ligdong ug kugihan nga mga silingan. Aron nga maoy moduma sa homeowners association. Sila ang motuon sa mga lagda, sila ang maningil sa mga wa mahatag, sila ang mobaraw sa mga abuso sa developers ug, kun di gyud paminawon, sila ang mangisog pagpasaka og pormal nga kaso atubangan sa HLURB.

 Ang pagpasaka og kaso sa HLURB di hinuon garantiya nga maatiman nang reklamo sa homeowners. Mas suod sa mga opisyal sa HLURB ang developers. Pipila sa kadagkoan sa HLURB gipasanginlan gani nga gipanghatagan og mga luna ug kabalayan sa pipila ka subdivisions.

* * *

Maong nagkinahanglan ka og maayong abogado. Nga, gawas nga nakasag-ulo sa tanang balaod subdivisions, nahibawo sab sa tanang palusot sa HLURB. Aron nga kun yak-an ang gipasaka nga kaso, kahibawo siya kinsa sa ulohang buhatan ang pahibaw-on sa binuang sa lokal nga mga opisyal.

Ang labing lig-on nga ebidensiya nga kahuptan sa homeowners batok sa developers mao ang brochures sa ilang subdivisions. Ubos sa balaod, obligado ang developers paghatag sa tanan nilang gisaad sa brochures. Laing alas sa homeowners mao ang lahutay. Bisan sa tanang masugat nga mga maniobra, angay’ng magpadayon sa lunsay’ng pakigbisog alang sa batakan nilang mga katungod.

Ayaw kahibung nganong nahibawo ko ining tanan. Kay duna koy mga silingan nga takos, ligdong ug kugihan. Ug maayo ang among abogado. Angay’ng magbantay ang Sta. Lucia Realty and Development, Inc. ug HLURB.

* * *

Email: [email protected]