Pagyaya sa RTWPB

Ang National Capital Region Wages and Productivity Board maoy labing unang mideklarar og “supervening condition” aron katugotan sila ubos sa balaud nga makasugod pagtuki sa posibling paghatag og laing usbaw sa suholan sa mga mamumuo bisan wala pay usa ka tuig sukad sila katapusang miluwat og wage order.

Human sa NCR ang RTWPB sa rehiyon 6 misunod sab dayon og deklarar. Nunot sa deklarasyon sa “supervening condition” sa maong mga dapit libre na ang ilang mga wage board nga motuki sa mga petitions for wage increase.

Dinhi sa Central Visayas ang mga sakop sa RTWPB nagtagbo niadtong miaging Martes sa gabii aron pagtuki kun duna bay mga basihanan paghimo og susamang deklarasyon. Apan way nakab-ot nga maayong resulta ang ilang tigom.

Si DOLE-7 acting director Exequiel Sarcauga miingon hinuon nga basi sa datus nga gisubmitir sa ilang technical staff dunay mga economic indicators nga nagpakita sa pagsaka sa mga presyo.

Apan bisan sa maong mga indicators wala pay disisyon nga gihimo ang atong RTWPB. Matud ni Sarcauga magtagbo sila og usab liwas sa semana santa aron ipadayon ang pagtuki kun hinog na ba ang panahon alang sa laing usbaw sa suholan.

Ambot unsay gidugayan sa mga sakop sa RTWPB nga tataw pa man sa silak sa adlaw sa udtong tutok ang mga timailhan sa panginahanglan sa dugang usbaw sa suholan. Dili na maihap ang pagsaka sa presyo sa produktong petrolyo sukad katapusang miluwat og wage order ang RTWPB niadtong Septembre sa miaging tuig.

Mas ikalipay unta sa mga mamumuo kun gisugdan na sa RTWPB og sayo ang pagtuki sa posibling usbaw sa suholan aron dunay mapaabot nga maayong balita atol sa pagsaulog sa Labor Day sunod buwan.

Gawas sa yaya nga aksiyon sa RTWPB dinhi sa rehiyon-7, laing problema nga naghulga sa pangindahay sa mga mamumuo mao ang kakuwang og representasyon sa labor sector diha sa board.

Hangtud karon wa pa man gud mahulipi ang laing labor representative sa RTWPB nga si Atty. Jose Boquecosa nga tua na sa gawas sa nasud. Bugtong si Marianito Ventura lang ang nagrepresentar sa labor sector sa pagkakaron diha sa RTWPB.

Kun moabot ang botasyon alkansi gyud intawon ang labor sector tungod kay gawas nga dili kumpleto ang representasyon, ang duha ka government sector representatives nahibaw-an na natong daan nga tua kapusta sa management.

Sa mga nangagi nga deleberasyon sa wage board kanunay nga tua modapig ang government representatives sa management. Busa hinaut nga aksiyonan na ni Presidente Aquino ang rekumendasyon alang sa bag-ong labor sector representative sa RTWPB dinhi sa rehiyon.

* * *

[email protected]