Ang pagbitay

Kagahapong adlawa gibitay ang tulo ka mga Pinoy didto sa China gumikan sa kasong pagpayuhot og ginadiling drugas. Sila si Sally Ordinario-Villanueva ug Ramon Credo gibitay sa Xiamen City samtang si Elizabeth Batain didto bitaya sa Shenzen, China.

Silang tulo gikatakda na untang patyon pinaagi sa lethal injection kaniadtong Pebrero 20 ug 21 apan wa kini dayona sa China human ipadala ni Presidente Noynoy Aquino kaniadtong Pebrero 18 si Bise Presidente Jejomar Binay aron hangyoon ang China nga paubsan ang silot sa tulo ka mga Pinoy nga patyonon.

Apan kaniadtong miaging semana pormal nga gipahibalo sa nasud sa China sa atong gobyerno ang ilang pagtakda na sa pagpatay nila ni Villanueva, Credo ug Batain kagahapong adlawa.

Sa pagkatinuod isip Chairman sa New Generation Against Drugs o NEWGAD usa ka kahugpongan nga rehistrado sa Securities and Exchange Commission nga nakigbatok sa ginadiling drugas aduna koy reserbasyon sa tulo ka mga Pinoy nga gi-lethal injection didto sa China kagahapong adlawa tungod kay gipatay sila gumikan sa pagpayuhot og ginadiling drugas.       

Kun tinuod nga dili sila inosente sa kaso ug nakigkumboya sa mga sakop sa African Drug Syndicate nga nagpayuhot og ginadiling drugas then, angayan lamang silang patyon bisan pa og sila Pinoy tungod kay pulos sila mga kriminal dili lamang didto sa nasud sa China kun dili sa tibook kalibutan nga ilang gibaligyaan sa ginadiling drugas nga makaboang, makamatay ug makaguba sa ugma sa tawo.

Apan kun tinuod nga sila mga inosente sama sa kaso ni Sally Villanueva then, angay ug matarong lamang gayod unta silang luwason sa atong gobyerno sa bisan unsang paagi tungod kay biktima lamang sila sa sindikato sa drugas nga mipahimulos sa ilang pagkinahanglan og trabaho ug salapi para sa pamilya.

Karon kay napakyas man ang kagamhanan sa pagsalbar sa mga Pinoy nga gipangbitay didto sa China angayan lamang kining paninglan sa pagpabaya sa iyang katungdanan. Angayan lamang kining boyboyon tungod kay maayo lang modawat og dollar remittance gikan sa atong mga Overseas Filipino Workers apan magpalingog-lingog lang kun mao na kini ang magpakitabang. Kun motabang man, uwahi na, kanunay makiglumba sa red light sa trapiko.

Ang kamatayon sa tulo ka mga Pinoy didto sa China makapahigmata na unta sa atong kagamhanan mahitungod sa pagpatuman gayod sa balaud sa ginadiling drugas ilabi na ngadto sa mga langyaw nga nagpayuhot og ginadiling drugas dinhi sa ato.

Sa miaging buwan ubay-ubay nga mga Chinese ug Taiwanese nationals ang nadakpan sa pagpalusot og binulto-bulto nga ginadiling drugas, unsa man buhian ba sila sa atong balaud ug papaulion sa ilaha aron magtumod na usab pagbalik og drugas dinhi sa ato?           

Sa laing bahin kun ang atong gobyerno nakahatag pa unta og daghang oportunidad sa pagpangimpliyo dinhi sa ato sa Pilipinas, wa seguro tay igsoon nga gibitay didto sa gawas sa nasud. Wa seguro tay igsoon nga manglangyaw o nanglangyaw kansang kamingaw sa pamilya giagwanta aron makaginhawa sa alimoot na kaayong kahimtang