Kapamilya Negosyo Na!

Labing dakong tumong sa Kapamilya Negosyo Na! mao ang pagpapas sa kahadlok sa pagnegosyo. Nga maoy hinungdan nga ang kinabag-an sa katawhan nipili sa pagpanrabaho, inay sa pagbarog sa ilang kaugalingong mga tiil. Mas luwas alang nila ang pagtanyag sa ilang kusog ug katakos bugti sa suholan matag petsa 15 ug petsa 30 sa matag buwan. Kay sa pagpangahas pagbubo og puhonan nga dako ang kakuyaw nga ang ginansiya mahurot ra sab og panukli.

 Naghilas-hilas mi pagsagubang sa dakong tahas unom ka tuig ang nilabay. Malipayon kong motaho ninyo nga buhi pa ang KNN. Ug pormal na namong gilusad ang iyang ika-unom nga season sa paghatag og puhonan sa mga may tinguha ug katakos sa pagnegosyo.

* * *

Ang labing dakong pasidungog sa pag-amuma sa KNN iya sa University of San Carlos College of Commerce Alumni Association (USC-COCCAI). Nga, inay matagbaw na lang sa naandan nilang kalihokan, nagtampu-tampo sa ilang mga hiniposan aron manakod ang ilang gugma sa patigayon ngadto sa labing kabos nga mga sakop sa katilingban.

 Sukad niadtong 2004, kapin na sa gatos ka mga indibiduwal ug pundok ang ilang natabangan ug nahimong mga magpapatigayon. May pipila di sama kamalampuson apan kasagaran nakabuntog sa ilang kahadlok pagbarog sa ilang kaugalingong mga tiil ug ang uban nakasugod na gani pagpalapad sa ilang mga negosyo.

* * *

Tungod sa tabang sa Department of Labor and Employment (Dole) Integrated Livelihood Program (DILP), ang USC-COCCAI makatanyag na karon og mas dakong puhonan alang sa mas daghang beneficiaries. Di hinuon si bisan kinsa lang ang kahatagan og puhonan. Ang mga aplikante kinahanglang moagi og makuti nga pagsuway aron pagtino nga di kiat-kiat lang ilang negosyo ug nga di mahurot ang puhonan alang sa way kapuslanan nga mga gastohan.

Ang KNN dunay sinemanang tulomanon (3-4 sa hapon matag Sabado) sa DYAB Abante Pa Bisaya! nga mogiya sa contestants unsaon pagsugod ang ilang patigayon. Ang inadlaw nilang kasinatian gisundan ug gisibya sab sa ubang mga tulomanon sa tibuok adlaw ug gabii.

* * *

Ang unang lakang sa mga gustong moapil sa KNN mao ang pagtambong sa seminar tibuok adlaw karong Sabado, Marso 26, sa USC Main Campus nga motudlo nila unsaon paghimo ang business plan. Mga magtutudlo sa USC College of Commerce ang magtinabangay pagtudlo nila sa nagkalainlaing lakang paghimo sa business plan.

 Ang libre ug Binisaya nga Business Plan Seminar gikan sa alas-8 sa buntag hangtod sa alas-3 sa hapon maglakip sa mosunod: Management ug marketing (pinaagi nilang Corazon Anzano sa Room JW440) ug Veronica Misa sa Room JW438); Financing (uban nilang Annaliza Tan sa JW440 ug Marcelino Avenido sa JW438); ug Production ug Operation (uban nilang Jovenal Arnaiz sa JW440 ug Pepito Echavez sa JW438.

* * *

Email: [email protected].