Lihok pa Bantay Dagat

Sa report ni Bantay Dagat project director Cesar Enriquez kagahapon iyang giisip nga maayo ang iyang performance.

Gipaatubang si Enriquez sa mga City Hall reporters kagahapon tungod kay dunay nag-ingon nga wala siya’y maayong performance.

Duna siya’y gipresentar nga mga report sa iyang accomplishments matag buwan. Daghan kuno nga mga isda nga gitumod sa kamerkadohan dinhi sa Sugbo nga gihimoan nila og pakisusi.

Apan wala g’yuy bisan usa nga nasakpan nila nga kuha sa dinamita o sa ubang illegal nga paagi. Maayo kun tinuod man ang iyang gireport kay maisip nato nga mihunong na diay ang mga illegal nga pangisda ilabi na ang paggamit og dinamita.

Ang katawhan gud makaduda man kay sukad si Enriquez miasumir sa pagka Bantay Dagat project director niadtong Hunyo 2006, duha ka buwan human gipatay si Elpidio “Jojo” dela Victoria wala g’yud siya’y dagku nga kalampusan.

Maingon ba nato nga human mapatay si Dela Victoria atul sa Miyerkules Santo niadtong 2006 miundang na ang mga badlongon sa ilang illegal nga pagpangisda?

Si Jojo ra ba diay maoy ilang gisungog kaniadto nga atul sa iyang pagdumala sa Bantay Dagat subsob sila nga magtumod og mga isda gikan sa lainlaing dapit nga kuha sa dinamita?

Dili ba posible nga wala lang ayoha nila ni Enriquez ang pag-inspection sa mga isda o kaha milubay-lubay lang sila sa kalihukan sa mga negosyante og isda?

* * *

Ang laing isyu nga gikomprontasi g’yud nako si Enriquez mao ang report kaniadto ni reporter Ely Bolonos, kanhi reporter sa Banat News, nga duha ka makina sa pumpboat nga nasakmit sa Bantay Dagat, gibaligya ni Enriquez.

Pwerteng pamalibad ni Enriquez kay kuno ang maong report buhat-buhat ra sa mga kanhi sakop sa Bantay Dagat nga iyang gitaktak tungod sa kwestyonable nga kalihukan.

Buyno, kun nagtug-an man si Enriquez sa matuod siya ra ang nasayod. Ang duha kuno ka makina nga giingong gibaligya anaa ra gitipigan sa ilang bodega ug kuwangan na og mga pyesa.

Kini maoy basihanan Kernel Enriquez nga husto ang akong tambag nga ang maong mga makina kun hingpit na kini nga nasakmit pabor sa kagamhanan angay na lang kini nga ibaligya, apan dili ikaw ang mobaligya kun dili ang City Hall pinaagi sa subasta.

Tan-awa, matud pa nimo ang mga karburador ug ubang kagamitan sa makina sa pumpboat wala na. Gipangawat na. Kinsa may matumbok nimo niining maong kahiwian? Giimbistigar ba nimo?

Dili tukma ang imong giingon nga dili dawaton sa General Service Office ang maong mga makina. Nahadlok man gud ko nga moabut ang panahon nga ang maong mga makina hingpit na g’yud nga mangahanaw, dili ra kay ang karburador sa makina.

Unya, lain nako nga sugyot mao ang paghatag kanunay og binuwan nga report sa City Hall sa imong kalihukan mata’g buwan. Mas labing maayo kun hatagan nimo’g kopya sa imong report ang mga sakop sa media alang sa transparency.

Alang nako daku kaayo ko’g pagsalig ni Enriquez nga makatuman siya sa katungdanan nga gisangon kaniya. Siya ang operations chief kaniadto sa Armed Forces Visayas Command ug taas kaayo’g kinaadman sa pagka sundalo.

Kun motrabaho lang g’yud si Enriquez, ilabi na og dili niya isalig sa iyang mga sakop ang paghimo’g operation, mahimong malabwan pa niya ang accomplishments ni Jojo dela Victoria.

Ang akong konklusyon mao kini. Wala pa makatupong si Enriquez sa kalampusan nga nahimo ni Dela Victoria. Kini gani ang rason nga siya gipapatay sa wala pa hiilhi nga mastermind.