EDITORYAL - Ang radiation sa text

Mikatap ang mga mensahe sa text sa miaging adlaw nanghadlok sa katawhan nga mapadpad kuno ang radiation gikan sa miulbo nga Fukushima nuclear power plant sa Japan nganhi sa nasud.

Unya gawas sa giingong di na ka pagawason sa balay aron di mapiskan sa radiation , pakaligoon ka og betadine ilabi na ang dapit sa liog kay ang thyroid kuno maoy rumbo sa radiation.

May mga lugar gyud kuno dinhi sa Sugbo nga mikalit lang og kamingaw ang palibot kay pagkadawat sa maong message sa text, nag-iyahay kuno sa pagpanghakot sa mga bata ang mga ginikanan, ug nanirado sa ilang balay   sa kabalaka nga matinuod ang nadawat nilang text nga inigka-alas 4:00 sa hapon, nia na sa nasud ang radiation nga ibulhot sa hangin.

May mga eskuylahan kuno nga mikanselar sa klase ug gipapauli ang mga estudyante sa kabalaka nga mokatap ang radiation ug unya may acid rain pa.

Ambot pagka-abtik sa uban mopakatap og mensahe nga binuang, unya di usab intawon mabasol ang uban nga dali kaayong motuo ilabi na niadtong kadaghan na makasugat og mga katalagman.

Ang tinuod kun may radiation man nga moabot dinhi sa nasud, maglisod pag-ikyas ang tawo niini.

Kini tungod kay di nato kini makita , ang masayran sa tawo mao ang abnormal nga pamati niya sa iyang lawas ilabi na sa iyang panit.

Apan ang Japan, anaa na sa hilabihan ka moderno ang mga ginamiton niini, nga kun nagtukod man sila og planta nuclear kansang radiation maghatag og hulga sa kinabuhi sa tawo, gidunganan na nila kini og panagang o protector aron nga dili maghatag og hulga sa kinabuhi.

Gawas sa ka-sirado sa ilang nuclear reactor nga gilibotan sa daghang solidong bongbong sa palibot niini, gibuhatan pa gyud og building nga sirado kaayo nga walay hangin nga makasulod.

Sa laktod, gigama nila ang maong planta nga siniguro ug wa nay radiation nga mohungaw ngadto sa gawas kun magkinaunsa. 

Apan hinuon, mas maayo mang di usab magkompiyansa, kay lisud na kaayong ipanagang kun naigo ka na. Di   ba?