EDITORYAL - Ang presyo sa asayte

Padayon ang pagsaka sa presyo sa asayte ug lain na usab kining isyu nga basehan sa mga drayber aron mangayo na usab og laing usbaw sa plitehan , o kaha sa mga mamumuo nga mangayo og umento sa suhol.

Ang maong mga butang pulos dili angay lalison ni kinsa man tungod kay mao kini ang trend o lakaw sa panahon.

Ang pagsaka sa presyo sa mga produkto sa petrolyo dili angayang ibasol ngadto ni kinsa mang lider sa usa ka nasud tungod kay ang nagbuot niini mao ang mga negosyante og asayte.

Usa niini ang organization of petroleum exporting countries (OPEC) kinsa maoy nasayud sa bul-og sa ilang produksyon ug ang gikusgon sa demand o panginahanglan niini.

Mahimong aduna pay laing mga tig-supply og asayte gawas sa OPEC apan mao gihapon ang presyo sa maong produkto, kun mosaka, aw mosaka gyud , ug wala si kinsa mang lider sa kalibotan way gahum sa    pagpugong niini.

Di malalis nga ang presyo sa asayte, maoy magsilbing gatilyo aron mobuto sa pagsaka ang tanang presyo sa mga baligya, serbisyo, plitehan ug tanang aspeto sa atong pagpakabuhi.

Mao man gani nga sa bahin sa mga driver, makatarunganon baya kanila ang paghangyo nga umentohan ang plite aron sila mabuhi nga malinawon.

Apan ang ato lang ihangyo sa taga LTFRB nga kun mouyon man sila sa umento sa plitehan nga ihangyo sa mga driver , mas maayo ang di bungkig, buot ipasabot nga di butangan og .50 ang tumoy kay mao ra og atong gitudloan ang mga driver sa pagpanikas sa ilang mga pasahero.

Kay bug-at baya kanila ang pagsukli og .50 ilabi na nga nihit kaayo ang maong sinseyo, busa ang di nila pagsukli, usa ka matang sa indirektang pagpanikas nga nagpasabot nga di hinlo ang ilang kinitaan kay may sagol mang panikas.

Sa bahin usab sa pasahero usahay mahasol ang iyang kaugalingon nganong di siya suklian nga kun daginoton mosangpot ra sa panaglalis. Di   ba?