Pag-ampo alang kang Ellah

Naglakaw ka lang nga mipauli sa inyoha kay usa ka lang ka kabus apan gipasakay ka sa luhong sakyanan nga gipanag-iya sa giingong langyaw nga may kuyog nga Pinay. Wa ka mahiuli sa inyoha nianang adlawa. Pagkasunod adlaw nakit-an na lamang ang imong patay’ng lawas nga giputos og luna nga gisulod sa usa ka sako ug gilabay sa bung-aw sa hilit nga dapit sa lungsod sa Barili.

Tungod sa nahitabo nimo Ellah daghan ang naapektohan. Katorsi ka adlaw human ka dagita ug patya gipatang-tang sa gobernadora ang hepe sa kapolisan sa lalawigan sa Sugbo kay gibakakan siya sa tinood nga resulta sa imbestigasyon sa imong kaso.

Tungod sa nahitabo nimo Ellah ang manag-uyab nga magsaulog unta sa adlaw sa gugma didto sa Hong Kong natanggong ug hangtod karon dili pa gihapon gawasnon tungod kay gipasakaan sila og kaso kay gipasanginlan sila nga maoy mipatay kanimo. Apan tungod kay makapasabot kun diin sila sa dihang gipatay ka naglibog ug nagtoo na karon ang mga tawo hasta ang gobernadora nga ang gipangdakop walay labot sa imong kaso. 

Tungod kay ako ug sila naglibog ug wa gayod masayod kun si kinsa ang midagit ug mipatay kanimo maong ako midangop ug mihangyo kanimo sa pagsulbad sa imong kaugalingong kaso pinaagi sa paggiya sa mga imbestigador sa imong kaso ngadto sa mga tawo nga mao gayod ang mihimo sa krimin diha kanimo.

Sayod ako nga ang imong kalag anaa pa dinhi sa kalibotan kay wa pa may kwarenta diyas maong naga awhag ako kanimo sa paghikap sa tingkoy sa tawong nagpatay kanimo aron mokalit lang siya pagtunga sa atubangan sa atong kapolisan ug moangkon sa krimin nga iyang nahimo diha kanimo kay kun ang police lang ugod ang atong saligan posibling di ka makakuha og tinuoray nga hustisya kay magpasagad lang pagpamunit og tawong himoong akusado sa imong kaso. Amen.