Tulay dili koral

Adunay duha ka managsuon nga pulos dunay kayutaan. Sa sinugdanan, nindot ang ilang relasyon. Hapsay, makidaiton, ug mahigugmaon. Kanunay silang magtinabangay sa usa’g-usa. Kanunay nilang gitan-aw ang mga panginahanglan nila ug sa ilang banay. Takulahaw lang nagbangi ang managsuon. Nagsugod kini sa gamay nga hinungdan. Nilipang ang maong panagbangi nga niresulta og away, panagsukliay og mga dautang pulong hangtud na sa pagbinungolay. Usa ka adlaw dunay panday nga mituktok sa pultahan sa maguwang: “Sir, basin duna kay angay ipabuhat dinhi sa imong panimalay sa usa ka panday nga sama nako” pangutana sa panday ngadto sa maguwang. “Maayo! “Lagsik nga tubag sa maguwang. Kita ka anang gikanal diha sa unahan? Wala unta na niadto apan ang akong silingan, ako man unta ni siyang manghod maoy nilungag niana sa nilabay’ng semana. Apan mahayan niya ang iyang gihimo kay patagmon ko siya! Na hala! Duol sa akong kamalig, atua didto ang pinundok nga troso. Buot ko nga imong kuralon kining akong panimalay sa taas nga koral aron ni bisan anino na lang sa akong igsuon dili ko hikit-an!” maisogong mando sa maguwang. “Nasabtan ko sir, ang buot nimong ipabuhat ug ako gilayon kining himuon” matud pa sa panday. Dayon milakaw ang maguwang. Gabas dukdok, gabas, dukdok maoy gihimo sa panday. Tibuok adlaw siyang nagtrabaho ug unya...usa ka tulay ang iyang namugna, tulay nga midugtong sa duruha ka managsuon. Sa pag-abot na sa maguwang gikan sa lakaw iyang nakita ang iyang manghod nga malipayon kaayo nga nag-ingon: “Manoy, maayo kaayo ka nako kay bisan pa man sa akong gisulti ug gibuhat, imo pa gyung gipatukod kining maong tulay” ug nag-abot sila sa tunga-tunga. Pagkakita niini, gikabiba dayon sa panday ang iyang mga gamit aron molakaw apan gitawag siya sa maguwang: “Ayaw una! Aduna pa ko’y ipabuhat nimo!” Buot ko untang magpabilin,” matud sa panday, apan daghan pang mga tulay ang akong tukoron.”

Mahinungdanon kaayo alang sa mga Judio ang dungog. Ang maong dungog ang nagasukad sa pakiglambigit sa banay o dili ba kaha pundok nga maoy nihatag niini. Mao nga higugmaon gyud ang pundok o banay. Mao nga pagaisipon nga kaaway ang si bisan kinsa nga naghatag og pakaulaw sa usa ka tawo nga sakop sa usa ka banay. Apan ang Ginoo sa atong ebanghelyo karon ang nihatag og usa ka linangkob nga pagsabot sa kahulogan sa pagpasaylo ug pagkamaayo. Ang pagbuhat og maayo bisan sa dili suod ni paryente usa ka dalaygong buhat nga angayan untang himuon ni bisan kinsang sumosunod sa Ginoo.