Isog nga mga tanod

Angay nato nga daygon ang mga tanod sa barangay Labangon kay malampuson nila nga nadakpan ang usa ka tawo nga giingong dunay daghang kaso ug nasakmitan pa nila og granada.

Naagian nako kagahapon sa buntag ang mga tanod nga natagbaw og gunit sa usa ka tawo nga naghapa sa karsada. Gihigtan nila'g pisi ang gibinaklid nga bukton niini.

Daw baboy ang maong tawo nga naghapa sa karsada ug dili halayo kanila didto sa karsada ang usa ka granada nga wala nay "pin" nga gipabuto unta sa tawo sa wala pa kini madakpi.

Wala na lang ko mokuha sa tinuod nga ngalan sa maong tawo nga nailhan sa iyang angga nga "Allen" diha sa Salvador Extention kay ang gihatagan nako'g pagtagad ang bayanihong lihok sa mga tanod.

Angay'ng pasidunggan sa dakbayan sa Sugbo ang maong mga tanod nga nakadakop sa maong tawo kang kansang kalawasan nabulit sa mga patik.

Ambut og unsay ikahulagway ninyo sa tawo nga magbulit og mga patik sa kalawasan. Kinahanglang tinud-on g'yud sa kapolisan ang pagpasaka og kaso nga illegal possession of explosives batok ni Allen.

Kuyawa niining tawhana kun masakpan sa mga "vigilantes" kay sigurado nga mausab ang iyang birthday. Sayonan ka nga gikuhaan niya'g pin ang granada ug giitsa na unta?

Swerte lang nga tayaon ug wala molibkas ang lock nga maka-trigger sa "firing pin" sa granada. Kun mibuto pa kadto sigurado nga dunay mga tawo nga mamatay kay ang granada diha ra daplin sa karsada.

Usbon nako, congratulations sa mga tanod sa Labangon!

* * *

Nganong nanghilabot man si Pardo barangay captain Fermin Dasmariñas sa operation sa mga sakop sa Market Operation Division (MOD) didto sa Pardo?

Nagkatinubagay g'yud sila si Kapitan Dasmariñas ug si market administrator Raquel Arce kay gipugngan man unta sa kapitan ang mga sakop sa Market Operations Division nga masakmit ang mga baligya nga giladlad sa karsada.

Wala man did-i ang mga tindera nga makapaninda sa ilang mga baligya diha sa Pardo apan kinahanglang adto sila magpahimutang sa ikaduhang andana sa Pardo Public Market kay wala may naninda didto. Alang nako, pabor ko nga ang mga tindera ug mga lagutmon ug utanom, apil na ang mga prutas, anha g'yud sa merkado maninda.

Dili ka ba diay gusto nga masulbad ang problema sa trapiko diha sa Pardo Capt tungod sa mga tindera nga anha magladlad og mga tinda daplin sa karsada?

Buyno, kamo usab nga mga tindera, ayaw kamo pagpugos nga anha gayud sa karsada maninda kay ang inyong presensya diha, apil na sa mga tawo nga mamili sa inyong produkto, makabalda sa pag-agi sa mga sakyanan.

Bisan pa og ibutang nato nga matag Sabado ug Domingo ra ang inyong pagpaninda, dili gihapon maayo nga tugotan kamo. Ipasabut ba diay nato nga mosugot ra kita nga ma -traffic ang maong lugar sa Sabado'g Domingo?

Si Bert nga taga Pardo, mi-text usab nako. "Duna unta ko'y ireklamo. Duha ka tindahan diri sa amo namaligya og ukay-ukay anaa na sa aseras giladlad tapad sa pawnshop dapit sa jeepney stop atbang sa police station. Ikaduha, namaligya og bugas tapad sa usa ka pharmacy dapit sa eskena ang isukli mga candy."

Nangutana si Bert kun nakalapas ba kini sa balaud. Yes, nakalapas g'yud Bert ug nalipay ko nga mireport ka niini. Gipahibalo na nako niini si market administrator Raquel Arce ug gipasaligan na ta nga aksyonan ang imong reklamo.