EDITORYAL - Si Singson ug Lacson

May punto baya ang mga magbabalaod sa ubos bay balaoranan nga ekspulsahon sa katungdanan si Representante Ronald Singson aron di sila maduhig sa ngil-ad nga dungog niini .

Ngil-ad tungod kay ang ginadiling drugas nga naghatag og dakong kadaot sa kaliboan na ka tawong migamit niini usa diay siya sa maong mga tawo.

Ang iyang amahan nga si Gobernador Luis Singson may punto usab dihang gisugyot niyang ipa-ekspulsa usab si Senador Panfilo Lacson gikan sa katungdanan tungod sa kaso niining double murder case.

Kining tanan kun analisahon pag-ayo sa katawhan nga nagpili kanilang duha, pulos gyud mga way kapuslanan ning mga tawhana, anugon kaayo ang boto sa katawhan nga maoy nagmontar kanila diha sa ilang puwesto.

Kun di palang mga dagkong tawo sa nasud ning mga tawhana angayan kaayong tawgon silang mga bastos, tungod kay una sa tanan walay respeto sa ilang kaugalingon ug walay kauwaw ug kaikog sa mga tawong nagtuboy kanila kinsa ilang gipatuo nga mga tarong sila nga tawo.

Karon pila pa sa mga anaa sa mga Balay sa mga Representante ug sa Senado ang pareha og kinaiya ni Singson ug Lacson.

Angay bayang usisahon pag-ayo sa mga liderato sa duha ka lawak sa kongreso kun kinsa sa mga kasamtangang nangatungdanan ang badlungon luyo sa pagkadesente sa ilang katungdanan.

Kay ang pagbuhat sa mga butang sama sa gipasangil ngadto kang Lacson ug Singson, mao lamang kadtong mga tawo nga nakabsan na og maayong paminsar, nawad-an og paglaum ning kalibotana busa din a sila angayan pang ibaolik sa katungdanan.

Mga tawo nga walay laing gilantaw kundi ang kaugalingon nilang interes, sa way pagpakabana nga nailad nila ang katawhan nga mibotar kanila .

Puerte gyung sipyata intawon sa mga nakabotar ning mga tawhana kay maayo kaayo nilang pagkailad hinungdan nga nakalingkod sa ilang katungdanan si Singson ug si Lacson.

Apan di paman tingale ulahi ang tanan, ang gipaabot lang sa katawhan sa nasud nga ang mga nagdumala sa senado ug sa ubos balay balaoranan maniid usab pag-ayo sa kinaiya sa kasamtangang mga magbabalaod sa nasud kun credible pa ba sila.

May maayo ba silang panglangtaw alang sa nasud, gawas sa dautang bisyo, lig-on pa ba ang ilang prinsipyo sa pagpabilin sa demokrasya sa nasud? Wa kahay magbabalaod kansang simpatiya pabor sa komunista? Di ba?