Pangindahay

CEBU, Philippines - Bag-ong tuig bag-ong kinabuhi? Sa pagsugat sa Bag-ong Tuig daghan ta og mga pangindahay. Nangindahay ta nga magmalamboon o magmauswagon ang atong panginabuhi aron makaginhawa og gamay sa kalisod nga atong nasinati sa milabay nang tuig o katuigan. Nangandoy ta og kalampusan sa negosyo o patigayon, maayong relasyon sa pamilya ug isig-ka-tawo, politika ug ekonomiya. Nangandoy usab kita og maayong panglawas.

Samtang adunay nangindahay ug nangandoy, aduna usay gustong magbag-o sa ilang kaugalingon sa pagsugod sa bag-ong tuig. Kun unsa man ang gusto nilang bag-ohon sila ra ang nasayod niini. Apan sa pagsulod sa bag-ong tuig mabag-o usab kaha ang kinabuhi sa mga tawo dinhi sa ato?

* * *

Sa wa pa ang bag-ong tuig miangal na ang mga manindahay og paboto sa dakbayan sa Lapu-lapu tungod sa kanihit sa mga namalit og paboto. Pero samtang sila miangal, mingisi usab ang atong gobyerno tungod kay miepekto na ang ilang kampanya batok sa mga paboto.

Kun migamay man ang halin sa mga manindahay og paboto tungod sa hugot nga kampanya nga gipasiugdahan mismo sa atong gobyerno, way laing mabasol niini kun dili ang mga mamohatay ra usab og paboto. Kay inay maghimo og paboto nga makalingaw sa tawo, makamatay ug makaputol naman hinoon sa kuyamoy sa tawo ang ilang gipanghimo.  

* * *

     Ang duha ka mananagat nga gipasanginlang mipatay sa sakop sa Cordova Marine Watch hugot nga nanghimakak sa pasangil nga gibato kanila. Matud pa sa usa sa mga akusado nga wa nila hilabti ang biktima hinoon nag-ilogay siya ug ang biktima sa armas niini kay buot silang pusilon apan natagak ang biktima sa dagat ug ilang gibiyaan. Apan ang otopsiya nagsulti nga ang biktima adunay daghang bun-og sa lawas ug gituok.