Ano ang Paskong darating?

Ano ba ang Paskong sa ati’y sasapit –

ito kaya’y mabituin at buwan sa langit?

Sa gayo’y maganda ang ating daigdig

sa tao at hayop na nasa paligid?

Ito ba ay Paskong di tulad nang dati –

magulo sa bahay at maging sa kalye?

Mga nagdiriwang laging nasa tabi

dahil sa pataya’t mga aksidente?

O ito ay Paskong ngayo’y nagbago na

sapagka’t naglaho rehimeng masama?

Sana naman sana o sana naman nga

masaya ang Paskong sa ati’y tatama!

Marami ng bagong nangyari sa atin

wala na ang palpak nating ‘‘hostage taking’’;

At pati si Ondoy ay naglaho na rin–

hindi na nadama sa bagyong dumating!

Saka sa gobyerno’y maraming nagbago

bago na ang ngayon ay ating pangulo;

Mga magsasaka’t mga empleyado

may darating kaya na saganang Pasko?

Sa sangay ng ating mga paaralan

ang bonus ng teachers kaya’y madagdagan?

Mga empleyadong sumobra ang yabang

sa ating gobyerno kaya’y mapalitan?

At ang Pasko nati’y magiging masaya

kung ang mga leaders ay nangagbago na;

Ang ‘‘graft and corruption’’ sana’y nawala na

upang ang mahirap nama’y guminhawa!

Malinis maganda ang mga lansangan

hindi na mabaho ang mga imburnal;

Daluyan ng tubig sa nayo’t sa bayan

wala ng basura at malinis tingnan!

Kung ito ang Paskong sa ati’y darating

tiyak maligaya itong bansa natin;

Sundalo’t terrorists magkasundo na rin –

mapayapang Pasko tiyak sasaatin!