Labok g'yud mayor

Malipay g’yud ko kun mopakita na’g labok si Mayor Michael Rama kabahin sa pagpatuman sa tukmang mga lagda sa walay kukahadlok nga dunay iyang mga dumadapig nga maapektahan.

Gitug-anan ko ni Market Administrator Raquel Arce nga ang kamandoan ni Rama mao nga kinahanglang ma-clear ang Pasil Fish Port sa mga tawo nga anaa na magpuyo sa maong building.

Kining Pasil Fish Port gigastohan kini og kapin sa P20 milyones kaniadto sa kagamhanan sa Belgium aron ang maong dapit maoy dunggoanan sa mga tigtumod og isda gikan sa laing mga dapit.

Apan kay wala na man kini gamita sulod sa taud-taud na nga katuigan, gipuy-an kini sa mga tawo nga walay klarong balay. Ang nakapait pa g’yud kay daghan kanila nangawat ra og koryente.

Kun tinud-on ni Rama nga papahawaon na gikan sa Pasil Fish Port ang maong mga illegal occupants aron ang maong dapit maoy balhinan sa mga tindera nga gikan sa Pasil Fish Market, mosaludo ko sa mayor.

Ayaw huna-hunaa Mayor Mike nga ang uban sa mga tawo nga maapektahan mibotar kanimo sa miaging eleksyon. Ingon ana man g’yud ang pagpatuman sa balaud, dunay masuko kay naigo ug duna sa’y malipay. Ang plano gud ni Rama mao nga gub-on ang nagkaguhay-guhay na nga Pasil Fish Market unya ang maong dapit himoon na nga public plaza.

Lipay gud kaayo ang kaparian sa San Nicolas kay magamit na man nila ang main entrance sa simbahan. Karon gisirad-an ra nila kay baho kaayo sa dapit sa entrance.

* * *

Gidayeg nako ang kadagkoan sa PAG-IBIG-Cebu kagahapon kay nindot kaayo sila og sistema nga dili makahasol sa ilang mga sakop.

Nagsaulog ang PAG-IBIG sa ika-30 ka tuig nga pagkamugna sa ilang ahensya. Miatubang ug nanubag sa pipila ka sakop sa media nga mitambong sa “Kapihan” mao ang Vice President for Visayas nga si Victoria dela Peña, ang manager sa Pag-IBIG Cebu nga si Antonio Enriquez ug ang iyang assistant, si Atty. Rio Teves. Duna sa’y ubang mga opisyal sa PAG-IBIG gikan sa Mandaue City branch nga mitambong.

Gihisgutan sa maong “forum” ang kabahin sa bag-ong balaud nga kinahanglang ipasakop na gayud sa PAG-IBIG ang mga kawani nga nagsweldo na og P1,500.

Sigurado hinoon ko nga wala gayud kini tumana sa daghang mga agawon. Ubos sa balaud bisan ang mga katabang sa balay kinahanglan na nga ipasakop sa PAG-IBIG.

Giapil nako pag-diskutir ang kabahin sa mga security agency nga abtik kaayong mangulekta og para contribution sa SSS, PhilHealth ug PAG-IBIG gikan sa ilang mga gwardya, apan dili i-remit. Gitug-anan ko ni Maria Corazon Cinco, ang hepe sa PAG-IBIG monitoring ug enforcement division, nga usa sa ilang problema kining mga security agency.

Matud ni Cinco nga gipangita gani nila karon ang opisina sa Sikatuna Security Agency tungod sa reklamo sa pipila niini ka gwardya nga ang giiban sa ilang sweldo alang sa PAG-IBIG wala giremit. Gitudloan nako ang taga PAG-IBIG kun unsaon nga matultolan nila pagdali ang opisina sa maong ahensya. Gihatagan usab ko’g kopya ni Cinco sa mga tawo ug kompaniya nga gikiha nila sa korte kay wala mo-remit sa gikolekta nila sa ilang mga kawani.

Pagsuwat nako niini dunay miari sa opisina nga nagdala nako’g kopya sa iyang reklamo sa Ombudsman batok sa SSS. Unya na lang nato kini hisgutan sa sunod natong lindog.