Malakanyang kuwang sa "S"
Bisan kun nasupalpal, apan ang Malakanyang way plano nga mo-surrender sa tinguha nga mapadayon ang truth commission.
Si Presidential Legal Adviser Ed de Mesa miangkon nga usa sa options nga gitan-aw sa Malakanyang sa pagkakaron human i-deklarar sa Korte Suprema nga “unconstitutional” ang Executive Order No. 1 nga nagmando sa katukoran sa “Truth Commission” mao ang pag-amendar niini.
Si de Mesa miingon nga nagtagbo na sila ni Presidente Benigno Aquino III ug sa ubang mga abogado sa Malakanyang maylabot niini. Giinsister ni de Mesa nga wala masayop ang Malakanyang sa maong EO, ang pagbaraw kanila sa taas nga hukmanan tungod lang kuno sa panaglahi sa ilang opinion.
Apan kun wa sila masayop nganong lakip man sa ilang gikonsiderar ang pag-amendar sa executive order? Usa sa mga sayop sa Malakanyang mao nga nagtinihik sila paggamit sa mga letra sa alphabet.
Husto si Senador Chiz Escudero usa ra ka letra sa alphabet maoy hinungdan sa dakong bulilyaso karon sa administrasyon ni Aquino ug kini mao ang “S”.
Kun gihimo pa sa Malakanyang nga “previous administrations” inay nga “previous administration” lang ang imbistigahon sa “truth commission” dili unta tingali ideklarar sa Korte Suprema nga nakalapas sa “equal protection clause” sa Batakang Balaud ang maong kamanduan.
Sa laktud kun gihimo pang plural sa Malakanyang ang subject sa EO No. 1 way rason aron kapasanginlan ang administrasyong Aquino nga nanglutos sa administrasyon ni kanhi presidente ug karon Kongresista Gloria Macapagal Arroyo.
Kun sa bagay, unsa may bag-o niining pagkasupalpal karon sa Malakanyang? Sukad sa sinugdan sa paglingkod ni Aquino isip presidente kanunay naman siyang bulilyaso.
Pila na ba ka higayon nga gi-recall, gi-revoke ug gisupalpal ang polisiya sa Aquino administration? Sa akong mahinumduman labing minus katulo na.
Mao ni ang resulta kun dili andam ang presidente nga atong gipili ug kuwang sa kasinati-an ug kahibawo ang mga tawo nga iyang gikuha isip mga advisers. Sa nanghitabo, angayan tingali nga susihon ni Aquino pagbalik kun haum ba sa pwesto ang mga higala niya nga iyang gitudlo.
Pananglitan, ang iyang executive secretary nga si Paquito Ochoa, dili kaha nga usa siya sa mga hinungdan nganong nagsunod-sunod ang mga bulilyaso sa iyang administrasyon? Nagkinahanglan si Aquino og mas makamao ug dunay igo nga kasinatian nga magsilbi niyang executive secretary.
Dili igo ang panaghigala nga mamahimong qualification sa pagtudlo og tawo nga ibutang sa mga sensitibo nga katungdanan.
* * *
- Latest
- Trending
