EDITORYAL - Ang pagbasura sa Truth Com.

Daghang nahibulong kun giunsa paghan-ay ang katuyoan sa Truth Commission nga sayon ra man kaayong gibasura sa Korte Suprema sa katarungan nga nasupak kini sa Batakang Balaod kon Constitution.

Lisud kaayong tuohan nga makaako ang mga huwes sa labaw’ng hukmaman sa pagtuok sa maong komisyon kun wala pa kini lig-ong basehanan.

Di ta makatuo nga gumikan lang sa “bayad sa utang” o “utang na loob” maoy himoong hungaw nga katarungan sa maong mga huwes nga mipitlok sa maong komisyon.

Kay una sa tanan dili sila mga bata nga walay kabuot nga modiretso lang og salindot sa usa ka butang nga itunol kanila sa walay pagpakabana   sa kamahinungdanon niini alang sa katilingbang Pilipinhon.

Labaw sa tanan , ang maong Truth Commission gipangulohan sa kanhi hepe sa Korte Suprema nga lisud kaayong tuohan nga ang giplastar nga mga katuyoan sa maong komisyon nasumpaki sa mga balaod diha sa Konstitusyon.

Si kanhi Chief Justice Hilario Davide Jr., naila sa iyang kamaayong laki sa pagtuhog ug pagsabot sa tanang balaod sa Batakang Balaod sa nasud.

Busa dili ka makatuo nga sa mga gihan-ay nga mga pulong diha sa katuyoan sa komisyon nga iyang dumalahon wala siyay hanaw ug nasayran sa mga punto niini.

Dako kaayo og pagtuo ang kadaghanan nga isip siya ang gitudlo nga hepe sa maong komisyon, gisuhito niya pag-ayo ang gihan-ay nga mga tumong sa maong komisyon una kini iduso ngadto sa Korte Suprema.

Dinhi nabuhi hinuon ang pagduda sa kadaghanan nga may panagkunsabo ang kanhi chief justice ug ang mga huwes sa labaw’ng hukmanan sa pagbasura sa Truth Commission aron kalikayan nila nga maimbistigar si kanhi Presidente Gloria Arroyo tungod kay sila pulos mga tinudlo sa ilang imbistigahunon.    

Hinuon basin nasayop lang ang katawhan sa ilang mga katahap, apan hinuon , sa sinugdan pa dihang gitudlo ni Presidente Noynoy Aquino si kanhi Chief Justice Davide daghan nang nagtuo nga dili kini makahimo sa pag-imbistigar sa kanhi Pamuno nasud .

Kun tuyo pa nga dili masabod ug wala nay higayong mabasura ang maong komisyon nganong wala man han-aya, plantsaha ug limpiyoha pag-ayo ang katuyoan niini pinasubay sa Konstitusyon ? Di ba?