Drayber ang silotan dili ang pasahero

Kaning plano karong pag-ban na sa rotang 21B diha sa downtown area sa dakbayan sa Sugbu sayon lang isulti ug ipatuman apan lisod kaayong pamalandongon ang epekto niini sa sumasakay.

Wala nay bale nang mga drayber sanglit bisan pa og kutob ran a sila sa Ayala ug sa SM dili man gyud kaayo kini makaalkanse kanila gawas lang nga mogamay gyud hinuon ang ilang kinitaan. Ang dakbayan sa Sugbu miinsister nga kinahanglang ang ordinansa gyud sa dakbayan ang masunod ug dili lang ang prangkisa sa mga jeepney. Tinuod mahimong iimplementar kini sa dakbayan sa Sugbu bisan mokusmod pa nang nawong sa mga drayber ug transport groups.

Tungod kay isip usa ka local nga kagamhanan aduna kini gahum pagpatuman sa balaod niini sa iyang teritoryo basta alang sa kinabag-an o sa kaayuhan sa kadaghanan ug dili lamang sa pipila.

Karon ang pangutana, kinsa may mas baga og maapektahan niini kung ipatuman ang pag-ban sa mga Mandaue route nga jeepney sa downtown area, ang sumasakay o ang rason sa mga opisyales sa dakbayan sa Sugbu? Tiaw mo na,kung ang imong kwarta paigo lang og one-way ride aron ka makauli sa inyoha gikan sa Mandaue padulong dinhi sa dalan Colon o vice-versa unsaon naman lang niini?

Unta palabihon sa dakbayan sa Sugbu ang sitwasyon sa mga sumasakay ug dili lamang ang ilang kaugalingong rason nga grabe ang traffic nga namugna sa maong mga rota ug ang pagka-kaskasero sa mga drayber nga tataw kaayong walay mga disiplina.

Dili solusyon ang pag-ban sa mga Mandaue –routes dinhi sa downtown area kay dili man siguro gyud na makalupig nga rason ang grabeng traffic ug ang pagka-kaskasero sa mga dryaber kung itandi unya sa liboang sumasakay matag adlaw sa duha ka dakbayan nga maoy maapektahan. Sagad sa mga sumasakay mga estudyante ug mga trabahante ug ang mga mangumprahay, sila pulos adunay gamit o bili sa atong katilingban ug ilabi na sa ekonomiya. Dili lang mga ordinaryong tawo ang manakay og jeepney paingon sa Mandaue ug Cebu City downtown area dili ba? Kun ang problema huot ang trapiko, ipatuman nila ang schemes sama sa number coding o color coding aron mamenusan ang bulk sa traffic sa mga naapektahang kadalanan.

Kun ang problema mao ang walay disiplinang drayber pasilutan sila og makatagam ang silot, kun makasala sa usa ka inisyal nga violation utingkayon dayon ang uban pang violation nga iyang nahimo nianang pagkadakopa.

Sumala pa sa panultihon adunay ‘1001 violations’ nga pwedeng mabuhat sa usa ka drayber bisan og giunsa pa niya pag-amping. Ang mga examples lang niini mao kini : walay ligo, baho og ilok, nagtsinelas, wala mag-seat belt, buak ang samin, buak ang suga, overloading, itom og aso etc..etc…etc…pulos kini adunay silot sa atong Traffic Laws.

Ang tawag ani nga matang sa pag-aresto ‘baling-baling’ ug makapatagam gyud ni sa mga drayber. Kun masakpan sa gamay nga traffic infraction ihurot dayon pamulta ang tanang violation una ibalik ang lisensya. Tan-awon nato og dili ba na sila magmatngon.