Lisud ba diay ipasabot?

Nakadawat ko og mga hulagway gikan ni Dr. Melche J. Caudor, usa sa mga lumulopyo sa La Paloma Subdivision, barangay Tisa ning dakbayan sa Sugbo.

Ang mga hulagway nagpakita kini sa daghang mga taxi units nga anaa ra giparking daplin sa karsada sa ilang subdivision. Sa pikas bahin sa karsada duna say nag-parking.

Sa ato pa, kun dunay moagi nga mga sakyanan adto na lang sa tunga nga bahin unya magbantay ka g’yud nga dili nimo mabag-iran ang mga sakyanan nga anaa sa masig ka daplin.

Bisan na man tingali og ako pa ang nahingtungdan dili g’yud ko malipay sa maong sitwasyon. Basi sa hulagway ang uban sa mga taxi nagdala sa plate numbers GXG-243, GKU-333, GWU-853, GWR-465.

Nagduda si Dr. Caudor nga kining maong mga taxi units nga walay kaugalingong grahe sukwahi sa gilatid sa LTFRB, mao kini ang kabahin niadtong mga gipalusot sa mga walay uwaw nga opisyal sa LTFRB.

Mga opisyal nga hangtud karon nagpabiling naghilom-hilom kay kun motubag sila sigurado man nga modaku ang isyu nga maglambigit sa ilang ngalan.

Dia nay kopya nga gipadala kanako sa mga katigayonan niining maong mga opisyal sa LTFRB-7 nga nalambigit niining anomaliya. Apan itandi ko pa kini sa ilang Statements of Assets, Liabilities and Networth (SALN). Basi sa lagda sa Office of the Ombudsman, kun ang mga opisyal ug kawani sa kagamhanan wala gani motug-an sa tanan nila nga gipanag-iyang katigayonan diha sa ilang SALN, taktak g’yud sa serbisyo.

Nalipay ko kay samtang gikampanyahan nako kining binuang diha sa LTFRB, daghan ang mialalay nako pagpadala og mga dukomento, apan padayon ko pa kini nga gitibuok.

Makalagot g’yud tinuod kay tungod sa pagbuot-buot nila og isyu nila og prangkisa, gadali kay aron dili masakpan, wala nila siguroa nga ang applicant dunay grahe sa ilang units.

Pwerteng daghana nang taksi karon nga maoy nakaingon nga huot na kaayo ang atong kadalanan. Tiaw mo nga misubra na sa 6,000 ka taxi units ang nagdagan.

Busa, hagit nako kini sa kadagkoan sa LTFRB. Unya, kini si LTFRB hearing officer Rey Elnar, kausa mipasalig man siya nga aksyonan dayon niya kun may reklamo, hala lihoka dayon ni Mr. Elnar!

Ikaw man g’yud ang gitudlo nga public information officer diha sa LTFRB nga dili makatubag sa pangutana sa media, hala aksyoni kini aron may matubag ka kun mangutana na ko nimo.

* * *

Nahuman na ang pag-inbentaryo sa mga taxi franchises nga giisyu gikan niadtong 2003 hangtud karon, apan wala pay gibutyag nga resulta.

Kining maong mga prangkisa kwestyonable kini kaayo kay dunay kamandoan nga dili usa mangisyu og dugang prangkisa sa taxi dinhi sa Sugbo gikan adtong 2003.

Apan unsaon, kining mga hearing officers sa LTFRB-7 sama nila ni Atty. Evelyn Misal ug Douglas Sanson wala man mopatoo. Sigi gihapon sila og hearing, unya miendosar sa approval sa mga prangkisa. Kadto usab nga mga nangaging direktor sa LTFRB mipirma usab bisan og sila nasayud man unta nga dunay moratorium nga giisyu sa ilang ulohan nga opisina.

Motoo ka kaha nga walay kwarta nga naglambigit niining maong mga transaksyon? Kadaghan na ko motinguha nga mointerview nila ni Sanson ug Misal, apan wala pay tubag.

Si Misal bisan og usa unta ka abogado dili gusto nga motubag sa isyu. Ngano man? Kun walay anomaliya niining inyong gihimo attorney dili kita maglisud pagpasabot.